Covid laka fimkhur turin mipui chah

Covid-19 chung­changa Mizoram sorkar thupuangtu Dr Pachuau Lalmalsawma, IDSP state nodal officer chuan, tun hnaiah Covid-19 a hluar leh deuh avangin mipuite'n fimkhurna nunpui thar leh se a duh thu a sawi.

Vanglaini palai nen an inkawmnaah Dr Pachuau Lalmal­sawma chuan, tun hnaia Covid-19 léng chu Omicron nia hriat a nih avangin mipuite'n an zuam deuh tih a sawi a, "Tun hnaia hripui vei ṭhenkhat chuan symptom an nei nasa a, an natpui hle. A symptom a nat avang hian test pawh a tam phah leh niin a lang," a ti.

Dr Pachuau Lalmal­sawma chuan, inthlahdah sual a hlauhawm thu sawiin, "Covid-19 avanga thihna êm a thleng lo a nih pawhin, mimal leh chhungkua a tihbuai nasatzia kan hre vek a, chuvangin fimkhur a ngai hle. Kum 17 mi chauh thite pawh an awm leh a, ngaihnêp ngawt chi a ni lo," a ti a, fimkhur chu invènna ṭha ber a nih thu a sawi.

Covid-19 Spokesper­son chuan, tun hnaia hripui veite zingah hmun khata awm khawm an tam thu sawiin, "Hei hian puipunna hmunah kan inthlahdah tawh tih a tichiang a, chuvangin, puipunna hmunah fimkhur lehzual a ngai hle. Tun hnaia Delhi-a Covid-19 thlìr lêtna neih a nih ṭumin central lam chuan uar zawka test neih leh an rawt a ni," a ti.

Hripui laka invênna ṭha tak chu Covid-19 nunphung dik zawm a nih thu sawiin Dr Lalmalsawma chuan, "Kan nunpui nasa tawh a, thil harsa tak a awm lo," a ti a, hripui laka inven­naaah ṭan la thar turin mipui a chah.

Covid-19 thupuangtu chuan, phai aṭanga rawn haw zingah hripui vei hmuh chhuah an awm thu sawiin, "Hei hian kan zin chhuak a nih pawhin kan fimkhur a ngai tih a tichiang a ni," a ti.