Bungrua a rawn lut ṭha tawh
Cachar district-a tuilian avanga hun eng emaw chen Assam aṭangin Mizoramah bungrua phurh luh mumal theih a nih loh hnuah tun hnaiah bungraw phur lirthei eng emaw zat Vairengte kaltlangin an rawn lut tawh.
Vairengte police checkgate daily report aṭanga alan danin, June 27, 2022 zing dar 8 aṭanga June 28 zing dar 8 inkar khan Assam aṭangin bungraw phur lirthei 436 a rawn lut. Lirthei rawn lut 436 zinga a tam ber chu ni tin mamawh phur a ni a, tuialhthei phur lirthei (tanker) 25 a tel.
June 28, Thawhlehni zing dar 8 aṭanga zan dar 5 thlengin lirthei 144 a rawn lut a, chung zinga 18 chu tuialhthei phur a ni. Lirthei rawn lut tam ber chu buhfai, gas, artui, alu, chi, chini, atta leh maida phurte a ni hlawm.