Kum 2021-22 chhungin AMC-in Nuai 3,917.36 hmu, nuai 4,444.88 hmang

Aizawl Municipal Corporation (AMC) rorelna sang ber, Board of Councillors (BoC) chu AMC BoC Hall-ah an ṭhukhawm a, councillor 19-te an tel kim. Kum 2021-22 chhung khan cheng nuai 3,917.36 an hmu a, cheng nuai 4,444.88 an hmang tih tarlan a ni.

AMC BoC Meeting hi mayor Lalrinenga Sailo-in a kaihruai a; executive councillor i/c Cash & Accounts Lalringliana tarlan danin,AMC chuan kum 2021-22 chhung khan cheng nuai 3,917.36 a hmu. Sum hmuhnate chu 15th Finance Commission aṭanga hmuh nuai 1,700, state sorkar aṭanga hmuh nuai 1,576.99 leh AMC thawh chhuah (own source of revenue) nuai 640.37 a ni.

Kum 2021-22 chhung vekin AMC chuan cheng nuai 4,444.88 an hmang a; hmanna lian zualte chu - establishment expense atan nuai 1,052.96, administrative expense atan nuai 1,281.74, fixed asset (mipui tana ṭangkai tur siamna) atan 1,449.67-te a ni.

AMC Mayor chuan, Aizawl khawpuiah kumin July-October chhung lei laih khap a nih thu sawiin, "Kum 10 chhunga Aizawla thil thleng zir chian a ni a, lei laih leh a kaihhnawih thil avangin Aizawl mipuite'n chhiatna kan tâwk nasa a ni tih hriain, Aizawl mipui himna turin lei laih khuahkhirhna dan kalpui a ni," a ti.

Mayor chuan, AMC Enforcement Committee din a nih tawh thu sawiin, "He Committee hian AMC hnuaia rules leh regulation-te ṭha taka kenkawh a nih theihna turin chak takin hma a la mek," a ti a; in sak khuahkhirh, leivûng paih, bawlhhlawh paih, vending chungchang leh thil dangte a huam dawn tih a sawi.

Lalrinenga Sailo chuan, Solid Waste Management Center, Tuiriala bawlhhlawh ṭawih theite leiṭhaa siam a, suma chantir turin Waste Tech & Bio Energy leh AMC-te'n thawhhona thuthlung an ziah tawh thu leh, chuta ṭang chuan AMC-in sum a hmuh dawn thu a sawi a; Aizawl khawpuiah unit 40 awmna toilet (inthiarna) 32 sak a nih tawh thu te, Swatch Bharat Mission (SBM) sum hmangin community/public toilet pasarih sak mek a nih thute a sawi bawk.