Finance Commission-in Saitual tlawh

Mizoram Finance Commission pahnihna, (2nd Mizoram FC) chuan nimin khan an chairman F Vanlalruata hoin Saitual district an tlawh a, Mizoram FC pakhatna hun aṭanga village council-te'n sum an hmuh hmanga hna an thawh ṭhenkhatte an endik.

2nd Mizoram FC hotute leh Saituala sorkar official-te chu DC conference hall-ah an ṭhukhawm a, bawrhsap VL Hruaizela Khiangte-in a kaihruai. Mizoram FC chairman F Vanlalruata chuan, tualchhung sorkar (local self government) indin chhoh dan leh Constitution siamṭhatna 73-na leh 74-na ten tualchhung sorkarte hnena thuneihna tam zawk a pek dan leh State Finance Commission kaltlanga sum leh pai ruahman dante a sawifiah.