MNF sorkarin an ngaihsak loh vangin Football academy tihtawp a ni - MPCC

Mizoram Pradesh Congress Committee chuan thuchhuah siamin, Mizo footballer eng emaw zatte inzir chhuahna TATA Trust Football Academy, Centre of Excellence, Mualpui chu MNF sorkarin an ngaihsak ṭhat loh avangin TATA Trust hotute'n an titawp niin an tarlang.

Centre of Excellence chu Mizo naupang tam takin an chhawr tih sawiin MPCC chuan, "Academy hi kum 2024 thlenga thawhhona thuthlung siam ni siin MNF sorkarin a ngaihsak ṭha duh lo mai ni loin, TATA Trust hotute hnenah MNF sorkarin sum ṭhahnem tak a dil avangin TATA Trust hotute lungawi loin Academy hi an titawp ta a ni," an ti.

Congress party chuan, Mizo naupang tam takin hun rei lo te chhunga an chhawr ṭangkai ni si, Mizoram sorkarin a ngaihsak loh avanga tihtawp a ni chu pawi an tih thu an tarlang a; sum leh pai, ei theih tur zawnga project lian pui pui siam ringawt ngaihtuah lo a, Mizo naupang infiam mite ngaihtuah zawk turin Sport minister Robert Romawia Royte an ngen.

MPCC tarlan danin, Mizoram sorkar leh TATA Trust-te chuan kum 2018 khan Mualpuiah TATA Trust Football Academy, Centre of Excellence an din a; Academy chhuak naupang zingah India junior-a tel eng emaw zat an awm tawh bakah, club lian zawmte an awm tawh a ni.