MULCO-in inkhawmpui an hmang

Mizoram Milk Producers' Cooperation Union Limited (MULCO) chuan nimin khan Bawngkawn South YMA Cultural Centre-ah Annual General Meeting vawi 26-na an hmang a, Cooperation minister C Lalrinsanga'n a hmanpui.

Cooperation Minister chuan, "Bawng vulh hi eizawnna tlaka siam kan tumna kawngah ramin hmasawnna tur tam tak a la nei a, chungte chu bawhzui turin theihtawp chhuah zel a ni," a ti.

MULCO hi AH&Vety department hmalaknain January 5, 1983-ah din a ni a, June 5, 1984 khan Mizoram Cooperative Act hnuaiah ziah luh a ni. Cooperative Act hnuaiah mahnia ro inrêl (autonomous body) niin, Mizoram pum huap tura duan a ni a, March 21, 1995 aṭangin AH&Vety department aṭangin dah hran a ni.

Tun dinhmunah MULCO hnuaiah affiliated society 53 awmin, chu'ngah chuan member 742 an awm a, member zinga mi 195-in MULCO-ah bawnghnute an pe mek. MULCO hnuaiah bawng 480 vulh mek a ni bawk.