MzSRLM hnuaiah bungrua sem

Minister of state Lalchhandama Ralte chuan nimin khan Darlawn RD block-a Mizoram State Rural Livelihoods Mission (MzSRLM) hnuaia self help group (SHG)-te hnenah custom hiring centre (CHC) bungrua chi hrang hrang a hlân.

Lalchhandama Ralte chuan, SHG chu thingtlang hmeichhiate dâwm kânna a nih thu leh MzSRLM chuan SHG kaltlangin thingtlanga retheihna ûm bo a tum thu a sawi a, "Hmeichhiate'n an hnathawh awlsam zawkna atan CHC bungrua hi hlan a ni," a ti.

Minister chuan, sorkar programme ṭhenkhat chu a rah hmuh tur awm loin a zuih ral fo tih sawiin, "SHG-te hmalakna erawh chu an deh chhuah hmuh tur a awm ta fo hi a lawmawm tak zet," a ti a; sorkar policy hlâwkpuitute chu mi dang tana entawn tlak ni tur leh an hnathawhte a hmuna en tlak ni turin a chah.

Bungraw inhlannaa tarlan danin, Darlawn RD block-ah SHG 318 din a ni tawh a, SHG member 2,583 an awm mek a, khaw tinah village organisation (VO) din tawh a ni.