Ni 60 hnua hripui vei hmuh tam ber ní

June 28, Thawhlehni khan Mizoramah swab sample 468 endik aṭangin Covid-19 vei mi 64 hmuh chhuah a ni a, ni 60 hnua hmuh tam ber ní a ni. Nimin khan hripui vei dam tawh mi pakua chhuahtir an ni a, Covid-19 vanga thi an awm lo.

Thawhlehnia hripui vei hmuh thar mi 64-te chu mipa 24 leh hmeichhia 40 an ni a, ZMC RT-PCR laboratory-a hmuh chhuah mi pakhat leh RAT hmanga hmuh mi 63 niin, positivity rate 13.68% a ni.

June 28-a Covid-19 positive hmuh chhuah zat 64 chu ni 60 hnu, kumin April 29 hnua hmuh tam ber ní a ni a, April 29 khan mi 83 hmuh chhuah a ni. Mi 64 zinga mi 26 chu Mamita SSA Girls Hostel-a mite an ni a; Aizawl khawpuiah mi 18 hmuh chhuah a ni bawk.

Lawngtlai district-ah Covid-19 vei pakhat hmuh thar a ni a, May 9, 2022 aṭanga positive an awm loh hnua an awm lehna hmasa ber a ni. Siaha district-ah May 11, 2022 aṭangin swab sample endik a awm tawh lo a, May 17 aṭanga tun thlengin hripui vei an awm tawh lo.

IDSP record angin, Mizoramah Covid-19 vei 2,29,009 hmuh chhuah a ni tawh a, mipa 1,06,608 leh hmeichhia 1,22,401 an ni a, mipa aiin hmeichhia 15,793-in an tam zawk. Nimin tlai dar 5 thleng khan mi 2,28,084 (99.60%) chhuahtir an ni tawh a, mi 703 (0.31%) thi tawhin, enkawl mek mi 222 (0.10%) an awm.