Mizoram sorkar leh HPC(D) inbia Thil a kal tluang - HPC(D) Council chairman

29th April, 2017

Mizoram sorkar aiawhte leh Hmar People Convention (Democratic) hotute chu inremna kawng zawngin nimin khan State Guest House, Aizawlah an inbe leh. A hmáwr la bàwk lo mah se inbiaknaa telte chuan thil a kal tluan thu an sawi ve ve.

Inbiaknaah hian Mizoram sorkar aiawhin Home department hotute an tel a, Home additional secretary Lalbiakzama chu team leader a ni. Member tel dangte chu - Home department-a joint secretary Lalhriatpuia, CID (SB) SP Rodingliana Chawngthu, deputy secretary R Lalṭhazuala leh OSD (Home) David H Lalthangliana te an ni.

HPC aiawhte chu - team leader Lalthanglien Hmar (LT Hmar), spokesperson Lalṭhalien, team member dang David Buhril, Dr John Pulamte, Lalthlamuana Hmar leh Lalrammuanpuia te an ni.

Mizoram sorkar aiawhte zinga an hotu ber Lalbiakzama chuan Vanglaini palai zawhna chhangin, inbiakna tluang taka neih a nih thu a sawi a, "Kan hlim tlang a, hma kan sawn zel a, inrem theihna tur kawng kan zawng zel a ni," a ti a; inremna tak tak leh a hmáwrbàwk theih hun tur erawh sawi theih a la nih loh thu a sawi.

Lalbiakzama chuan, HPC(D) nena inbiak leh hun tur ní tak tihchian theih la ni lo mah se, kumin June thla velah inbe leh tura thu dah a nih thu a sawi bawk.

Vanglaini palai zawhna chhangin HPC(D) aiawhte hotu, Council working chairman Lalthanglien Hmar (LT Hmar) chuan, inbiakna ṭha taka an neih thu a sawi a, "Thil a kal tluang a, rei tak kan sawiho a, inremna hmáwr kan la báwk lo," a ti a; thil tih tur a tam avangin vawi hnih/khat inbiak maiah chuan inremna siam a la beisei awm loh thu a sawi.

LT Hmar sawi danin, inbiaknaah hian autonomous district council chungchang sawi lan a ni lo a, Sinlung Hills Council thuneihna tur leh a kalphung turte sawiho a ni thung.

Thu dawn danin, nimina inbiaknaa an sawiho zingah, remna thuthlung siam huna HPC(D) hel, nunphung pangngaia lette khawsak phung pangngaia an khawsak theihna tura ṭanpuina pek dan tur pawh a tel a; thu mûm erawh siam a la ni lo.

Mizoram sorkar leh HPC(D)-te hi an inbiak hnuhnung ber chu December 16, 2016-ah a ni a, inremna tura ruahmanna an duan point pasarih awmna Frame Work Agreeement pawm a ni tawh.

Mizoram sorkar phût angin HPC(D)-te chuan police pakhatin silai pahnih tlanbopuia HPC(D) a zawmpui leh Zokhawthiang dáia MLA-te an lambun ṭuma police silai an chhuhsak parukte chu Mizoram sorkarah an pe kîr tawh bawk.

Sorkar leh HPC(D) inbiak tawh dan
Inbiak Ni Inbiakna Hmun
1. 11.11.2010 State Guest House, Aizawl
2. 31.01.2013 State Guest House, Aizawl
3. 19.04.2013 Tourist Lodge, Sakawrdai
4. 18.07.2013 Tourist Lodge, Chaltlang
5. 14.08.2013 Tourist Lodge, Chaltlang
6. 10.08.2016 Tourist Lodge, Chaltlang
7. 5-6.10.2016 State Guest House, Aizawl
8. 16.12.2016 State Guest House, Aizawl
9. 28.04.2017 State Guest House, Aizawl