KHAWTHLIR

MUP OB thar
Mizoram Upa pawl (MUP) chuan April 27, 2017 khan Vanapa Hall-ah Assembly vawi 45-na an hmang a; kum 2017-19 chhunga MUP office bearer turte thlangin, president-ah RK Thanga, vice president-ah Lalhuapzauva leh treasurer-ah R Thankima-te an thlang.

Thisen pe
Vairengte Chhimveng Bial KṬP chuan nimin khan Chhimveng Kohhran hall-ah blood donation camp an huaihawt a, mipa 29 leh hmeichhia 10-te'n Kolasib District Hospital tan thisen unit 39 an pe. MSU headquarters, Tlungvel pawhin thla thum dana an tih ṭhin angin nimin khan Aizawl Civil Hospital-ah thisen an pe bawk.

Tuitla la hmu lo
Lalropuia (36), Zawlpui, April 26, 2017 chhun dar 12 vela Khedachera, Tripura Bazar-a kal tur Langkaih luia tla chu mi tlawmngaite'n an zawng mek a, nimin tlai thleng khan a ruang hmuh a la ni loa thu dawn a ni.

Damdawi man
Central YMA hnuaia SRS leh Health department-a Food & Drugs Administration-te chuan April 27, 2017 chhun dar 12:30 vel khan Ṭhuampui, Aizawlah khuh damdawi (cough syrup) ALTOREX-CT bâwm 22 leh a neitua puh, Lalsangliana s/o Zairemthanga, Ramhlun Vengthar nia insawi an man. ALTOREX-CT báwm pakhatah hian bûr 144 zel a awm a, an man zawng zawng chu bûr 3,168 a ni a; Rs. 6,33,600 vel hû a ni.

P&E hna thlirho
Power & Electricity department-a officer-te chuan, nimin khan an department secretary H Lalengmawia hoin P&E department hnathawhte an thlir let a, P&E hnuaia contractor-te pawh telin, harsatna an tawhte leh chak zawka hnathawh dan turte an sawiho. Review meeting-ah hian P&E engineer-in-chief Liannghinglova Pachuau-in an department hmasawn dan leh hmachhawpte a sawifiah.