CM-in Latawh-a airport siam tum a nih thu sawi ; Champhaia thil thleng bul tumtuah party mite puh

Chief minister Lal Thanhawla chuan, Siaha district-a Latawh ramah airport siam turin DPR buaipui mek a nih thu a sawi. Tun hnaia Champhai DC Complex-a lirthei hâl leh Circuit House bungruate tihchhiatnaa a bul tumtute chu political party mite niin a sawi bawk.

Nimina Congress Bhavan-a inkhawmah thu sawiin Lal Thanhawla chuan, Mizoram chhim lam chu chhuahká a la nih dawn thu a sawi a, "Latawhah Lengpui Airport aia ṭha mah airport siam theihin an hria a, DPR buaipui mek a ni," a ti a; Lawngtlai thlengin rêl kawng kaltir tura buaipui mek a nih thu a sawi.

Chief Minister chuan, NEDP chu a chhiar leh hria apiangin ṭha an ti nia sawiin, "Central lamah pawh ṭha an ti a, UNDP-te pawhin rawn tel ve an duh," a ti.

Kum 2018-ah Congress party a sorkar leh loh chuan Mizoram chu a ding chhuak tawh ngai lo ang tih a hlauhthawn thu sawiin, "Kan sorkar lehna dâltu hi vawiin thlengin engmah a la awm rih lo... Term khat in sorkar leh chuan kan ram hi tihchhiat rual lohin in hotute'n an siam hman tawh ang," a ti.

CM Lal Thanhawla chuan tun hnaia Champhaia motor panga hâl leh Circuit House bungruate tihchhiat a nih chungchangah, "Champhaiah thil theih loh ngiatin MZP-te'n harsatna an siam a, chuta motor hâltute leh Cuircuit House tichhetute chu party dang hnathawktute an ni," a ti.

MPCC President chuan, eptute'n hmanraw chi tinreng an hmang tih a sawi rualin, minister-te eirûkna sawi tur an hre lo niin a sawi a, "Hmanraw chhetê remchang apiang an hmang mai. Thil dangah min puhmawhna tur an hriat loh avangin buaina siam apiangah an tel ve nghal ṭhin," a ti.

Lal Thanhawla chuan, CSS Hindi teacher-te nawrhna leh CM Bangla hung chhunga an luhnaah MNF-te inrawlhin, a fuihpawrhtute an nih thu a sawi.

NIAS chungchang pawh MNF-te'n remchangah an hmang nia sawiin, "Sorkar hnathawk hlemhlete'n a enkawltu minister-te an thlim a, kan rinhlelhte chu kan suspend a, enquiry an ti mek. Hrem ngai an awm chuan huaisen takin kan hrem ang. Tute chungah pawh action la turin kan fihlîm a ni," a ti.

Assembly House-ah private member resolution, zu chungchang sawinaah member-te'n kohhran demna an sawi lo nia sawiin Hawla chuan, "Anmahni hmuh dan leh hriat dan an sawi a, kohhran lampang demna pakhatmah a awm lo. An thu sawi kha a dik lo a nih pawhin, a mawh chu Pathian lakah anmahni khan an phur a ni," a ti a; chuti chung chuan MLA-te dem tum eng emaw zat an awm niin a sawi.

Lal Thanhawla chuan, MNF-te chuan Congress sorkarah kawng chhia bak sawi tur an hre lo nia a sawi rualin, "Keini aia kawng chhia state dang an tam," a ti a; "Politics-ah thil hlui, thu hlui a awm lo a, englai pawhin tharthawh mai tur a ni," tiin, Tuirial HEP chungchang pawh sawi zel turin an party mite a chah a ni.