Mamitah doctor dah belh turin CM ngen

MZP headquarters, Mamit hruaitute chuan nimin khan chief minister Lal Thanhawla chu an hmu a; Mamit district hmasawnna tur thil chi hrang hrang an thlen a, chu'ng zingah chuan Mamit District Hospital-a doctor dah belh tura ngenna a tel.

Mamit MZP thuchhuah tarlan danin, CM Lal Thanhawla hnenah hian Mamit District Hospital-ah doctor an indaih loh avangin doctor dah belh turin an ngen a; staff nurse leh IV grade-te dah belh turin an ngen nghal.

April 30, 2017 ral hmaa Mamit District Hospital-a doctor dah belh an phut chungchangah, sorkar hotute'n doctor lak belh hun nghak tura an ngenna chu zahawm an tih thu an sawi a; "Hmalak zel dan tur leh kal zel dan tur chu Committee-in a rel dawn a ni," an ti.

Mamit Higher Secondary School-ah Science leh Commerce zirna dah tur te, Mamit College-ah Geography, Public Administration leh Sociology department-te 2017-18 academic session-a ṭan hman a nih theih nana dah tur te, Mamita Power & Electricity office tan line check-na tur motor pe tur leh thawktu dah belh turtein an ngen. Mamit District Jail, NH-44A kawng siam mek tihchangtlun chungchangte an sawipui bawk.