Book of the Year lawmman hlân

Mizo Academy of Letters (MAL) chuan nimin khan Hrangbana College Golden Hall-ah an din champha an lawm a; Book of the Year 2016 atana an thlan, 'Aizawlah Aizawler' tih ziaktu Lalhruaitluanga Chawngte hnenah lawmman an hlan.

MAL din champha lawmna hi an president Lalthangfala Sailo-in a kaihruai a; khuallian, minister R Lalzirliana chuan, Mizote chu ṭawng khat hmang hnam a nihnain a phuar khawmnaah leh khawtlanga nunhonaah puitu a ni tih a sawi a, "Ṭawng hi inthlak reng a ni a, rilru zau zawka kan dawnsawn a ṭul rualin, ṭawng un leh ṭawng kauchheh kan vawnhim a pawimawh," a ti.

R Lalzirliana chuan, MAL chu thu leh hla tuipuitu pawl zinga belhchian dâwl berte zinga mi a nih thu a sawi a; ṭawng humhalhna kawngah nasa zawka hma la zel turin a fuih.

MAL hi kum 1964-ah din a ni a, tun dinhmunah donor member pahnih, life member 48 leh member 100 chuang an awm mek. Mizo thu leh hla tihhmasawn nan leh ziak mite chawk phûr turin kum 1989 aṭangin kum tin Mizo iráwm chhuak lehkhabu (lehlin tel lo) zinga ṭha ber Book of the Year an thlang ṭhin a ni.