7th. Pay hman hun tur la hriat loh

Planning minister Lalsawta chuan,khawi state mahin sorkar hnathawkte hlawh tur a hranpain sorkar laipuiah an dil ngai lo niin a sawi a; Central 7th. Pay anga Mizoram sorkar hnathawkte hlawh pek hun tur sawi theih a la nih loh thu a sawi bawk.

Nimina Congress Bhavan-a inkhawmah 7th. Pay chungchang sawiin Lalsawta chuan, MIzoram sorkarin Central Pay Commission angin state sorkar hnathawkte hlawh a pek ve ṭhin thu a sawi a, "Tu state mahin sorkar hnathawk hlawh atan Central-ah sum an dil ngai lo. State tinin kan tlin hunah kan pe mai ṭhin," a ti.

Finance minister Lalsawta chuan, kum 1956-ah First Pay Commission angin sorkar hnathawkte hlawh pek a nih thu leh kum 10 danah tihpun ṭhin a nih thu a sawi a, "Mahse, kan zawm barh thei lo a, kum thum vel hnuah kan zawm ve ṭhinin ka hria," a ti a; sorkar laipuiah erawh chuan sum lamah harsatna a awm loh avangin Pay Commission rawtna anga an kal nghal ṭhin thu a sawi.

Lalsawta sawi danin, sorkar laipuiin sum a neih zawng zawng aṭanga 7% vel chiah sorkar hnathawkte hlawh atan a hmang a; Mizoram sorkar erawh chuan state sum neih zawng zawng aṭanga 36% vel sorkar hnathawkte hlawhah a hmang ṭhin a ni.

Finance Minister chuan, 7th. Pay chungchang chu Cabinet meeting-a la ngaihtuah tur a nih thu a sawi a, "Tun maiah chuan Mizoram sorkarin a hmang ve nghal mai dawn em tih sawi mai theih a ni lo. 7th. Pay hi kan la hmang ve tho turah ka ngai a, mahse, a hun tur erawh sawi theih a ni lo," a ti.