NGO-te Mizote vengtu awm chhun - Duhoma

ZNP president Lalduhoma chuan nimin khan an party pisaa inkhawmah thu sawiin, tunah chuan tlawmngai pawlte chauh chu hnam dangin Mizote an chîmralna laka vengtu awmchhun an ni ta niin a sawi.

Lalduhoma chuan, tun hnaiah a thawhpuite nan Bairabi rel chawlhhmun an enfiah tih sawiin, rel chawlhhmunah ILP Counter siam ni mah se, mumal taka duty an la awm lo a, ILP Counter paltlang loin awlsam takin a hêlna kawng pahnih a la awm reng tih a sawi.

ZNP thuchhuah tarlan danin, ZNP hotute leh Bairabi Branch YMA hruaitute inkawmnaah, ILP kengkawh tura thawktu an dahte'n sum siam nan an hman ṭhin thu te, vawi khatah mi tam tak ta tur ILP a hlâwma an pek chhuah ṭhin a nih thu te, chumi ven hna chu YMA-in nasa taka an thawh ṭhin thute an sawi lang niin a tarlang.

ZNP tarlan danin, Vairengte Police checkgate bula September 6, 2016-a ILP Cell hawnah nimin thleng khan hnam dang 6,842 hnenah temporary ILP pek a ni tawh. Hawn a nih aṭanga December 31, 2016 thlengin mi 2,651 hnenah pek niin, kuminah January 1 aṭanga April 25, 2017 thlengin 4,191 pek a ni tawh.

ZNP chuan, temporary ILP pek a pung tual tual chu enchian ngai an tih thu leh, Mizoram himna atan uluk zawka enfiah ṭul an tih thu an sawi.