MJA-in library lawmman an dawn an lawm

MJA general headquarters chuan, nimin khan Aizawl Press Club-ah MJA Public Library-in tun hnaia lawmman a dawn an lawm a, Mizoram State Library-a state librarian Lalramliana'n a hmanpui.

Inkhawm hi MJA vice president Zonunsanga Khiangte, MJA Public Library Committee chairman-in a kaihruai a; Lalramliana chuan, sorkar hriatpuina hnuaia kum hnih vel chauh MJA Public Library-in lawmman a dawng chu a lawmpui thu sawiin, "Library nei ve NGO-te tan he library hi a entawntlak hle. NGO enkawlna hnuaiah library eng emaw zat kan nei a, hengte hi a nih dan tur anga enkawl a nih loh avangin library hmasawn zel tur tiṭhuanawptu leh kan ṭhanmawhbáwk a ni," a ti.

Lawmna inkhawmah hian Mizoram Library Association president Dr C Lawmzuala leh MJA president Vanlalrema Vantawl-te pawhin thu an sawi a; Mizoram Library Association executive member Dr Lallaisangzuali'n lehkhabu leh library pawimawhnate a sawi.

MJA Public Library hi kum 2001-ah kha tih laia Lok Sabha MP Vanlalzawma'n MP fund aṭanga Rs. 3,00,000 a pek hmanga bul ṭan a ni a, January 1, 2014-ah sorkar pawmpuina hmuin, tun dinhmunah lehkhabu 5,010 a awm mek.

Mizoram State Library, Art & Culture department leh Mizoram Library Association ṭangkawpin kumina '11st State Level Library Seminar & Training for Rural Libraries' an buatsaihah MJA Public Library hian 'Top 10 Aizawl District (Aizawl City) 2016' leh 'Highest Total Donation of Books 2013-2015' a dawng a ni.