Mizorama Covid-19 vei mi 147 zinga Mi 95-te hripui lakah an fihlîm tawh

Zoram Medical College (ZMC) Covid-19 Laboratory-ah June 25, Ningani khan Covid-19 hripui vei mi pahnih hmuh chhuah a ni a; chutih laiin, hripui vei zinga mi 19 chuan an vei tawh lo tih hmuh chhuah a ni bawk. Mizorama Covid-19 vei hmuh tawh zawng zawng chu mi 147 an ni a, chu'ng zinga mi 95 (64.62%) chuan an vei leh tawh lo tih finfiah a ni a, vei mek mi 52 an awm.

Nimin khan Covid-19 vei tawh lo mi 17 chu enkawl an nihna hmun aṭangin chhuahtir an ni. Heti hian hripui vei tawh lo mi 95 zinga mi 47 chu chhuahtir tawh an ni a, mi 48 (Lunglei district 48 leh Serchhip district 2)-te erawh chu Dedicated Covid Health Centre (DCHC) leh Covid Care Centre (CCC)-ah an la awm rih thung.

SRH-ZMC Bulletin tarlan danin, June 25 khan ZMC laboratory-ah mi 1,054-te swab sample endik a ni a, mi 1,052-te'n hripui an vei loh laiin, mi pahnihin an vei tih hmuh chhuah a ni. Covid-19 vei hmuh chhuah tharte hi Maharashtra aṭanga rawn haw, Aizawl district-a quarantine facility-a awm lai an ni a, kum 3 leh kum 23 mi hmeichhia ve ve niin, harsatna an nei lo (symptom a lang lo).

Hripui vei hmuh chhuah thar pahnihte hi nimin khan State Referral Hospital (SRH)-ah dah luh an ni a, hripui vei rinhlelh thilah mi pahnih dang dah luh an ni bawk.

Covid-19 vei vanga SRH-a enkawl mek zinga mi pakua - mipa pahnih leh hmeichhia pasarih chu an dam tawh avangin nimin khan chhuahtir an ni a, Aizawl district mi paruk (mipa 2, hmeichhia 4), Saitual district mi pahnih (hmeichhia ve ve) leh Serchhip district mi pakhat (hmeichhia) an ni. SRH-ah hian hripui vei mi 18 enkawl mek an ni a, harsatna nei an awm lo.

Lawngtlai district-a Covid-19 vei mi pariat, hripui vei tawh lo tih June 24, Nilainia finfiah tawhte pawh nimin khan an awmna Lawngtlai CCC aṭangin chhuahtir an ni bawk a; anni hi mipa puitling panga, hmeichhe puitling pahnih leh mipa naupang pakhat an ni.

Covid-19 vei Lunglei district-a mi 10 leh Serchhip district-a mi pahnihte pawh June 25 khan hripui an vei tawh lo tih hmuh chhuah a ni a, anni hi DCHC/CCC-ah an la awm rih a, an chhuah thuai beisei a ni. Hetih lai hian, Covid-19 vei tawh lo nimina SRH aṭanga chhuahtir zinga Serchhip district mi pakhat chu Serchhipa DCHC-ah awmtir rih a ni dawn niin sorkar thuchhuah chuan a tarlang.