Sorkar bultumin Remna Ni hman a ni ; Mizoram remna hi miin an awt - CM Zorama

Nimin, June 30 kha India sorkar leh MNF-te'n inremna thuthlung, Memorandum of Settlement (MoS) an ziah ní, (Remna Ni) champha vawi 36-na a ni a, Mizoram hmun hrang hrangah lawm a ni. Aizawlah chuan sorkar bultumin Vanapa Hall-ah lawm a ni a, khuallian chief minister Zoramthanga chuan, Mizoram remna ang chu miin an awh thu a sawi.

CM Zoramthanga chuan, India sorkar leh MNF-te'n inremna thuthlung an ziah chu India sorkar, ramhnuaia MNF hruaitute leh Mizo mipui duh dan tak a nih loh thu sawiin, "Kan vaia kan sírtlûk theihna a ni a, kan pawm tlân theih tura Pathian min pek a ni. Khatih lai khan Mizoramah kan awm ve lo a, Zoram hlim ber ní a ni ang tih a ni. Zoram a hlim a ni," a ti.

Meghalaya, Assam, Tripura, Nagaland leh hmun dangah pawh ramhnuai mite leh sorkarin inremna an ziah a tam tawh thu sawiin CM Zorama chuan, "An ramah inremna tluantling a awm ngai chuang lo. Mizoram danglamna chu, kum 30 chuang inremna a awm hnuah awmze neia ram­hnuaia chhuak an awm lo," a ti a, Mizo­ramah chuan inremna ziah a nih hnuah buaina siamtu an awm tawh loh thu a sawi.

Zoramthanga chuan, Mizoramin remna a neih ang chu miin an awt nia sawiin, "Kan remna neih hi a kalkawng pawh a hahthlak. Kan inremna hi kan chhehvela mite'n an hriatin ropui an ti. Hei hi kan theihna bik a ni lo a, Pathian thil thlâwn pek a ni. Remna kan neih hi kan vawng himin, a chhiat hlau tur kan ni. Keini anga inremna ṭha, tluantling leh tlo a awm lo," a ti.

Chief Minister chuan, Mizoramin thil siam lian tak tak thawn chhuah tur a neih loh thu sawiin, "Thawn chhuah tur kan neih, miin an duh ber chu remna kan neih ang hi a ni," a ti a; Remna Ni-ah hian remna hlutzia hre thar a, vawng him a, mi dang hnena remna chanchin ṭha puangtu nih tum ṭheuh turin Mizo mipui a sáwm.

Remna Ni lawmna hi chief secretary mawhphurhna la mektu Navin Kumar Choudhary-a'n a kaihruai a, NGO Coordina­tion Committee aiawhin CYMA vice president Lalhmachhuana leh Mizoram Kohhran Hruaitute Committee chairman Rev.Dr Van­lalnghaka te pawhin thu an sawi a ni.

MKHC Chairman thusawi
MKHC chairman Rev.Dr Vanlalnghaka chuan, Mizoramah tute emaw chauh an hausak a, an dam a, an hlim a tâwk lo tih sawiin, "Rilru leh thlaraua kan dam tlànna a pawimawh. Remna Ni hian chumi kawng chu min zawhpui thar se, kan zavaiin ṭan i la thar ang u," a ti.

Inremna a hlawhtlin zel theihna atan mipui an dam tlàn a ngaih thu sawiin Rev. Dr Vanlalnghaka chuan, "Lungawi lote lungawi loh chhan hriata thawi dam a ngai. Mahni inhai vûr duhna leh hmasialna aṭangin inremna dik a thleng ngai dawn lo," a ti a, remna chhawm nung a, hmasawn zel turin thuhnuairawlh a ngaih thu a sawi.

MKHC Chairman chuan, remna a awm theihna atana palai turin kohhran pariat kal khawmin an din Zoram Kohhran Hruaitu Committee (tuna Mizoram Kohhran Hruaitute Committee)-in theihtawp an chhuah ve thu sawiin, "Kawng awlsam a ni lo. Remna a awm theihna atana hma latu dangte hmalakna nen Pathianin mal a sàwm a, remna kan nei ta a ni," a ti.

Lalhmachhuana thusawi
NGO Coordination Committee aiawha thu sawitu Lalhmachhuana chuan, ram rálmuang takah a chhunga chêng Mizote'n ram nuam, khawtlang nuam siam turin Zo nun ze mawi an vawn nun reng a ṭul thu a sawi a, "He ram nuam tak min rawn tempuitu leh kan mikhualte hi hmuhsit tur an ni lo a, an ngaihnêp theih zawnga awm tur a ni hek lo," a ti.

Lalhmachhuana chuan, remna leh muannain a ken tel, zalenna hman sual a awm lohna turin inven thiam a ṭul thu sawiin, "Sum leh pai îtna leh hausak châkna vanga pawisak nei lo ang maia khaw êng pawh zah zo loa mahni hmasialna kawng zawhte hi kan do tlân a hun ta," a ti a, Mizoram tichhe thei tur thil chi hrang hrang lakah ṭan rual tlat a ṭul thu a sawi.