India sorkar leh MNF-te'n inremna an ziah laia Mizoram chief minister Lal Thanhawla chuan, rambuai chungchangah Mizoram history a dik loa ziah a hlauhthawnawm thu a sawi.
Remna a awm theihna tura a thil tih avanga Mizo­ram Pradesh Youth Congress Committee (MPYCC)-in nimina Cong­ress Bhavan-a an chawi­mawinaah thu sawiin Lal Thanhawla chuan, Mizo hnamin history dik a neih theih­na atan tih dan tur a ngaihtuah ṭhin thu a sawi a, "Tel ve si lo, tel vea insawi, thusawi huai deuh deuh an tam tawh si. A sawi huai ho hi an intihriain an sawi thiam hlawm si a, a buaithlak khawp mai," a ti.
Lal Thanhawla chuan, rambuai dan chu thil ho tak a nih thu sawiin, "Rambuai dawn February 28, 1986 khan Rev. Sa­khaw­liana inah senate meeting kan nei a, senate secretary ka nih angin record-tu ka ni. Rèl lâwk a nih dan chuan, zan dar 12-ah Assam Rifles post lâk vek tur a nih bakah, treasury-te rawk tur a ni," a ti a; zan dar 10 velah MNF president Laldenga'n ṭhulh leh a rawt a, mahse, Sangau leh Tuipang lam an hrilh theih loh avangin ram a buai tâk thu a sawi.
Mizoram buai dan a hohzia ṭhangtharte'n hria se ṭha a tih thu sawiin Hawla chuan, "Mi beih hrim hrim duh leh dâwt sawi hreh lo an tam. Tuna ka thusawi hi thu dik, Lal hmaah pawh dinpui ngam a ni. London-a awm Pu Laldenga ko haw tur khan Pu Lalduhoma kha passport nei remchang a nih avanga tír kan ni a, Indira Gandhi tirh a ni lo. Lal Thanhawla te, CL Ruala te leh Congress hruaitute tirh a ni. Return ticket, pocket money cheng sing thum nge, sing nga ka chiang ta lo, kan pe," a ti. 
Lal Thanhawla chuan, remna leh muanna Mizo­ramin a neih hnu kum 11-ah pawh MNF-in martar-te chhawmdawl leh an puala hmalakna a nei miah lo nia sawi­in, "Congress party chuan Mizoram tana mai­chàma an thisen hlu tak dahkhamtute pual­in June 1997 khan CTI, Sesawngah lung kan phun. Sorkar hnate an tan bik pek a ni a, duhsak theih­na hrang hrangah duhsak an ni," a ti a, Peace Accord Review Commi­ttee pawh kum 2008-ah Congress sorkar din a nih thu a sawi bawk.