Leivûngin ram leh lui a tihchhiat dan MP Vena'n NHIDCL hotute a hrilh

Rajya Sabha MP K Vanlalvena chuan June 29, Nilaini khan New Delhi-ah NHIDCL managing director Chandal Kumar leh general manager (technical) Ashok Kumar Jha te an pisaah a kâwm a; NHIDCL-in Mizorama kawng an laihnaa an leivûng paih danin chhiatna a thlen thu a sawipui bakah, leivûng paihin ram a tihchhiat thlalak leh video-te a pe.

K Vanlalvena chuan, Mizoram hmun hrang hrangah NHIDCL-in NH kawngpui an laih mek chu Mizoram hmasawnna leh Act East Policy atana ṭangkai tur a nih avangin lawmawm a tih thu a sawi a, "Hetih rual hian, Mizoram hmun hrang hranga NHIDCL hnuaia contractor leh sub-contractor ten an hnathawhah work order-in a phût anga hna thawk loin, an tana awlsam tur ringawt ngaihtuaha leivûng an paih hi dan kalh a ni a, forest leh environment an tichhe nasa a, mi tam tak thlai chìnna leh luite a chhiat nasat phah hle," a ti.

Kawngpui laih mek chu Mizoram sorkar enkawlna hnuaia dah loa NHIDCL hnuaia thawh a nih avangin NHIDCL hotute chu uluk zawka enkawl tura ngenin Vanlalvena chuan, contractor-te chu a rang thei ang bera thunun a ṭul thu leh a ṭul anga action lak a ṭul thu a hrilh bawk.

Rajya Sabha MP hian October 2021-a sorkar laipuia Road Transport minister Nitin Gadkari hnena a thlen tawh, Mara Autonomous District Council chhunga Kawlchaw - Lawngmasu emaw, Tuipang-Lawngmasu emaw double lane kawngpui lai tura ngenna a lo thlen tawh chungchang a bawhzui bawk.

NHIDCL Managing Director chuan, Kawlchaw-Lawngmasu chu PMGSY kawng a awm avangin Zorinpui aṭanga Lawngmasu double lane kawng siam belh zawk tura ruahman a nih thu leh, chu chuan MP rawt anga Chhimtuipui lui kam lawng kal theihna turin Lawngmasu a thlen dawn tho avanga hrethiam tura a duh thu a lo hrilh.

Chandal Kumar chuan, Lawngmasu pawh tura double lane kawngpui sial turin DPR an peih tawh thu leh km. 28-a thui a nih tur thu te, December 2022 aṭanga thawh ṭan theih a beisei thute a sawi bawk.