Myanmar aṭanga lut kuhva hâltute YMA leh VC-te'n an thlâwp

Taitesena Group YMA leh Kawrthah Joint Village Council chuan thuchhuah siamin, dan loa Myanmar aṭanga kuhva rah lak luh donaa Hachhek Bial Kuhva Chingtu Pawl (HBKCP) hmalakna leh Zamuanga kuhva rah man hâl a ni chu an thlàwp thu an tarlang.

Taitesena Group YMA chuan, "HBKCP-te'n harsatna chi hrang hrang an tâwk mek a, an harsatna sukiang tura an hmalakna hi Taitesena Group YMA chuan kan thláwp tlat a, an hmalak zelnaah thawhpui kan inhuam reng a ni," an ti.

Kawrthah Joint VC chuan, Mizorama kut hnathawktute thar kuhva hralhna kawnga harsatnate sukiang turin HBKCP hmalakna an thlàwp tlat tur thu tarlangin, "An hmalakna hrang hrangah theihtawp chhuah kan inhuam reng a ni," an ti a; kuhva chingtu pawl leh kut hnathawktute chu HBKCP hmalaknate ṭawiawma thawhpui turin an ngen.

Tarlan tawh angin, HBKCP duty-te chuan June 27, 2022 zan zanlai pelh hnu khan Zamuangah kuhva rah Tripura/Assam lama phurh chhuah tur ip 285 an man a, truck aṭanga hlàn thlâk a nih hnuah June 28 chawhma lam khan hâl a ni.

HBKCP president Lalzawna chuan Vanglaini palai zawhna chhángin, Vairengte kudam aṭangin Myanmar lam aṭanga lak luh kuhva rah phurh chhuah a awm thu an dawn avangin an duty a, kuhva rah leh a phurtu truck chu an lo man tih a sawi.