KHAWTHLIR

Dan loa oil zuar enfiah
Lawngtlai District Magistrate-in June 9, 2022-a Lawngtlai khawpuia dan loa tuialhthei zawrh khapna thupek a chhuah bawhzuiin June 29, Nilaini khan Enforcement Team chuan Lawngtlai SDC H Vanlalbiakzauva hoin Lawngtlai khawpuiah dan loa petrol leh diesel zuar an awm leh awm loh an enfiah a, dan loa tuialhthei zuar man an nei lo.

AMWF hruaitu
All Mizoram Women Federation chuan June 29, Nilaini khan ATI Auditorium-ah kum 2022-2024 chhunga hruaitu tur an thlang a, president atan Prof. T Vanlaltlani leh general secretary atan Mimi T Lalhmachhuani an thlang.

Police-te endik
1st IR Police hotute chuan Health department nena ṭang dunin ramri - Saiphai, Zophai, Saihapui-V, leh hmun danga duty mek police-te hriselna dinhmun enfiahna June 29, 2022 khan an buatsaih a, sikserh laka invênna atan an thosi lênte damdawiin an chiahsak nghal. He hunah hian Kolasib-a doctor-te an thawk chhuak a ni.

PEAM an lâwm
Provisional Employees Association of Mizoram chuan thuchhuah siamin, provisional employee-te leh contract-a thawkte sum renchemna (austerity measure) vanga nghet thei loa dahna thupek July 1, 2022 aṭanga hlih a ni dawn ta chu lawmawm an tih thu an tarlang. PEAM chuan, "DPAR-in kan ṭhatna tura ro min rêlsak ṭhin avang leh Finance department-in kan mangannate hria a, kan harsatnate min paihsak hi kan lawm tak zet a ni," an ti.

Lawmpuina hlan
Aizawl East-II bialtu MLA Robert Romawia Royte chuan a bial chhunga HSLC leh HSSLC pass thar mi 468 te hnenah lawmpuina thilpek a hlan.

Zirlai chawimawi
MZP Headquarters, Saitual chuan nimin khan Saitual College-ah kumina HSLC, HSSLC leh undergraduate exam-a ti ṭha 126-te chawimawina hun an buatsaih a, minister C Lalrinsanga’n hmanpuiin, zirlaite hnenah chawimawina thilpek a hlân. C Lalrinsanga chuan Pathian ṭih tlat chunga zirna-a an kal a nih chuan Saitual aṭangin mi ropui an chhuahzel tur thu a sawi.

Heroin man
Champhai police-te chuan June 29, Nilaini khan Champhai-Aizawl maxicab pakhatah Chingsiantung (19) s/o Thangkhankham, Bukphir, Myanmar hnen aṭangin heroin gram 284 an man. Heroin hi international market-ah cheng nuai 142 man a ni.