Mizoram remna anga remna leh muanna zîktluak a awm lo - PC President

Peoples' Conference party president Lalhmangaiha Sailo chuan Remna Ni puala thuchah tichhuakin, Mizoram mipui chibai a bûk a, Mizoram anga remna thuthlung ziah vanga remna leh muanna zîktluak a awm loh thu a tarlang.

Lalhmangaiha Sailo chuan, India ram hmun hrang hrangah sorkar leh hel pawlte'n inremna an ziak tawh ṭhin tih sawiin, "Mizoram anga remna thuthlung ziah vanga remna leh muanna tluantling leh zîktluak hi India ram hmun dangah a awm lo tluk a ni," a ti a; Kristian ram nihna nena inhmeh taka India rama state rálmuang ber tia vuah leh hriat a ni chu chhuanawm a tih thu a sawi.

PC President chuan, India rama state rálmuang ber nia duh tâwk mai lo a, Mizoram chu state hmasawn chak ber tih a nih theih nan hmalak a ṭul thu sawiin, "Rinawmna, dikna leh taimaknaahte state entawn tlak tia vuah leh hriat kan nih theihna atana hmang ṭangkai tur leh 'Remna Ni hi hlut thiam turin Zoram mipui ka ngen a ni," a ti.