Cong leh MNF-in PC sorkar din oil depot an hmang duh lo: ZPM

ZPM Ṭhalai chuan thuchhuah siamin, Congress sorkar leh MNF sorkar chu PC sorkar laia Vairengtea tuialhthei chhêk khawlna (oil depot) hmang duh loah an puh.

ZPM ṭhalaite chuan, kum 1982-a PC sorkarin Vairengtea oil depot an lo siam tawh, PC sorkar a tlak kum 1984 aṭanga hman chhunzawm a ni lo chu pamhmái an tih thu an tarlang a, “A hnua sorkarna changtu Congress leh MNF party-te’n thil ṭhaah pawh sorkar hmasa hmalakna an chhunzawm duh lo hi mipuite’n kan tawrh phah a, ram hmangaih lo zia hlein kan hria,” an ti.

Kum 35 chhung Mizoram chu state puitling a nih tawh hnuah pawh ṭhenawm state-ah tuilian, ramri buai leh thil dang vanga harsatna a awm apianga tuialhthei dah khawlna mumal lo vanga tuialhtheia Mizoram mipui an buai ziah a hun tawh lo hlea an hriat thu sawiin, “Sorkarna lo chelh tawhtu Congress leh MNF tan mualphona lian tak niin kan hria,” an ti. Supply Minister-in oil depot sak tur a tih chu a tak ram thlentir thuai tur leh Vairengtea oil depot tuaihnûm turin MNF hruai sorkar an phût thu an sawi bawk.