Kuminah sikserh vanga thi la awm lo

Mizoramah kumin January aṭanga May thla thlengin sikserh (malaria) vei mi 1,881 hmuh chhuah a ni a, sikserh vanga thi an la awm lo.

National Health Mission (NHM), Mizoramin State Vector Borne Disease Control Programme (SVBDCP) record a tarlan danin, kumina thla nga, January-May chhunga Mizorama sikserh vei hmuh chhuah mi 1,881 zinga 1,339 chu Malaria PF niin, mi 542 chu Malaria PV an ni a, sikserh vanga thi an la awm lo. Hetih lai hian, nikum chhung khan Mizoram pumah sikserh vei mi 5,637 hmuh chhuah niin, sikserh vangin mi 10 an thi.

Ministry of Health & Family Welfare hmalaknain India ram pumah kum tin April thlaah sikserh do thla, Anti Malaria Month hman ṭhin a ni a, kuminah pawh hman niin, sikserh ûm bo turin kawng hrang hranga hma lain beihpui thlâk a ni.