Hmun hrang hrangah Remna Ni hmang

Nimin kha MNF leh India sorkar ten inremna thuthlung, Memorandum of Settlement an ziah ní, Remna Ni champha vawi 36-na a ni a, Mizoram hmun hrang hrangah lawm a ni.

Lunglei
Lungleiah chuan Remna Ni hi Convention Centre-ah lawm niin, Lunglei North bialtu MLA Dr Vanlalṭanpuia’n a hmanpui. MLA chuan, Mizoram Peace Accord-in remna leh muanna a thlen bakah, Mizoram University leh High Court a keng tel tih a sawi a; Mizo ṭhalaite hmasawnna turin Mizoram Youth Commission-in theihtawp a chhuah zel dawn tih sawiin, all India service-ah an la tlin ngei a beisei thu a sawi.

Siaha
Siahaah chuan minister of state TJ Lalnuntluanga hoin New Siaha MYA Multipurpose Hall-ah Remna Ni hman a ni a, Minister chuan, “Remna Ni hi tute ta bik mah a ni lo a, Mizorama cheng te ta a ni. Remna Ni-in a hrin chhuah zalenna hman thiam viau a ngai,” a ti.

Champhai
Remna Ni hi Champhaiah chuan Kahrawt Community Hall-ah hman a ni a, minister of state K Lalrinliana leh Champhai North bialtu MLA Dr ZR Thiamsanga ten an hmanpui. K Lalrinliana chuan, harsatna naménlo tawrh laia remna siam tura thawktu political party, sorkar official, kohhran, tlawmngai pawl leh mi ṭhahnemngaite hmalakna fakawm a tih thu a sawi.

Kolasib
Kolasib-ah chuan Parish Hall-ah minister Dr R lalthangliana hoin hman a ni. R Lalthangliana chuan, rálmuanna leh zalenna awm lohnaah ramin hma a sawn thei lo tih sawiin, “Tuna hmasawnna hmél kan hmuh mekte hi ram leh hnam tana nunna thàpa ke pênte vang a ni,” a ti a; remna hlut thiam a, hmasawnna tihlawhtlingtu nih tum tur leh hmasawnna rualkhai leh intluktlânna ram a nih theih nana thawktu ni ṭheuh turin mipui a chah.

Serchhip
Assembly deputy speaker Lalrinawma, Tuikum bialtu MLA hoin Serchhip BNRGSK Hall-ah Remna Ni lawm a ni a; Lalrinawma chuan, “Buai lai hrehawmzia hre reng chungin remna hlutzia hi ngaihtuah ṭhin ila, he remna chhawm nung zel tur hian theihtawp i chhuah zel ang u,” a ti a, remna tel lo chuan hmasawnna a awm thei lo tih a sawi.

Lawngtlai
Lawngtlai DC conference hall-ah pawh Remna Ni lawm a ni a, Assembly speaker Lalrinliana Sailo-in a hmanpui. Speaker chuan, “Remna a awm theih nan ram mipui zawng zawng ṭang rualin theihtawp chhuaha hmalak a ni a, remna kan neih hi kan zavaia thawh rah a ni,” a ti.

Mamit
Mamitah chuan Chhimveng YMA Hall-ah Remna Ni lawm a ni a, minister R Lalzirliana leh Dampa bialtu MLA Lalrintluanga Sailo ten an hmanpui. Minister chuan, “Mizoramin remna a neihna kawngah sawi dan leh pawm dan inang lo pawh ni se, remna kan neihah hian kan tel ve a ni tih kan pawm tlan a pawimawh. Rem lohna hmunah rorelna dik a awm thei lo,” a ti a, remna chawi nung zel turin mipui a chah. Inkhawmah hian Mamit district-a HSLC, HSSLC leh undergraduate exam-a ti ṭhate hnenah chaiwmawina a hlan a ni.

Saitual
Remna Ni hi Saitual College-ah pawh lawm niin, minister C Lalrinsanga khuallian a ni a; C Lalrinsanga chuan, “Remna kan neih theihna kha hlawhtlinna nasa tak ni mahse kan tawpna a ni lo a, economic independence kan sual leh mek. State intodelh, ṭhenawmte kuta innghah ngai lo leh ṭanpui ngai loah kan state hi siam kan tum a ni,” a ti.

Khawzawl
Khawzawlah chuan deputy chief minister Tawnluia, bialtu MLA hoin Zaingen Branch YMA Hall-ah lawm a ni. Tawnluia chuan, “Remna man a to a, a hautak avangin a hlutzia leh mipuiin kan zavaia thawh chhuah a ni tih kan hriat thar a pawimawh,” a ti a; remna tluantling a awm reng theih nan a venghim hna chu Mizo mipui mawhphurhna a nih thu a sawi.

Hnahthial
Remna Ni hi Hnahthialah chuan Electric Veng community hall-ah lawm a ni a, Lunglei East bialtu MLA Lawmawma Tochhawngin a hmanpui. Lawmawma chuan, “Remna leh muanna hi Pathian min pek a ni a, kan neih theihna turin a hmanrua atan kohhran, NGO, political party-te a hmang. Hmasawnna hrang hrang inkalpawhna te, zirnaahte leh kan thlarau nunahte a thlen a ni,” a ti.