Bilkhawthlir PHC sak thar hawn a ni

Health & Family Welfare minister Dr R Lalthangliana chuan nimin zing khan Bilkhawthlir Primary Health Centre (PHC) sak thar a hawng. Minister chuan, NESIDS hnuaiah Kolasib District Hospital chu khum 100 awm theihna tura tihlen tum a nih thu a sawi.

Dr R Lalthangliana chuan, Serlui consti­tuency chu Mizoram luhká a nih angin hriselna lamah hmanrua leh thawktute tihchangtlun zel a pawimawh thu sawiin, “Thawktute pawhin mipui tana rawngbawlna rilru púa hna an thawh a ṭul. Serlui biala health sub-centre zawng zawng chu health & wellness centre-ah hlàn kai vek a ni tawh a, Vairengte Community Health Centre pawh tihchangtlun zel tum a ni,” a ti.

Sorkarin hmasawnna tura ruahmanna hrang hrang a neihte chu hripui léng vang leh harsatna dang vangin tum anga kalpui theih a nih loh thu sawiin R Lalthangliana chuan, “Health department-a thawktu indaih lohna vanga harsatna sukiang tura hna lak tura ruahman tam tak pawh beisei angin hnawhkhah a la ni lo,” a ti a; Health department chu ṭha lehzuala thawm ṭhat a nih mek thu a sawi bawk.

Bilkhawthlir damdawi-in hi NABARD sum nuai 225.58 hmanga sak thar a ni a; a hawnna inkhawmah hian Serlui bialtu MLA Lalrinsanga Ralte, HFW principal director Dr T Lalhmangaihi, NHM mission director Dr Eric Zomawia, Kolasib chief medical officer Dr Lalawmpuii Chhangte leh mi pawimawh dangte an tel a ni.