Positive enkawl mek zat a pung hret hret

June 29, Nilaini khan Mizoramah swab sample 386 endik aṭangin Covid-19 vei mi 39 hmuh chhuah a ni a, positivity rate 10.10% a ni. Nimin khan hripui vei dam tawh mi 19 chhuahtir an ni a, Covid-19 vanga thi an awm lo. Mizoramah positive enkawl mek zat a pung leh hret hret.

Nilainia hripui vei hmuh thar mi 39-te chu mipa 13 leh hmeichhia 26 an ni a, Rapid Antigen Test hmanga hmuh chhuah vek an ni. Mi 39 zinga 27 chu Aizawl district-a mite an ni a; Siaha district-ah May 11, 2022 aṭangin swab sample endik a awm tawh lo thung a, May 17 aṭanga tun thlengin hripui vei an awm tawh lo a ni.

IDSP record angin, Mizoramah Covid-19 vei 2,29,048 hmuh chhuah a ni tawh a, mipa 1,06,621 leh hmeichhia 1,22,427 an ni a, mipa aiin hmeichhia 15,806-in an tam zawk. Nimin tlai dar 5 thleng khan mi 2,28,103 (99.59%) chhuahtir an ni tawh a, mi 703 (0.31%) thi tawhin, enkawl mek mi 242 (0.10%) an awm.

Nimin tlai dinhmun angin, Mizorama district 11 zingah Covid-19 positive awm tawh rih lohna district pali - Siaha, Champhai leh Khawzawl district-te a awm a; positive active case tamna ber Aizawl district-ah mi 130 an awm tling leh tawh a, Serchhip district-ah mi 40 leh Mamit district-ah mi 31 an awm bawk.