NITI Aayog ruahmanna state-te'n kan chhawr ṭangkai mek - CM Hawla
NITI Aayog Governing Council chu Pathianni khan New Delhi-ah an ṭhukhawm. Meeting-ah hian chief minister Lal Thanhawla'n thu sawiin, NITI Aayog-in ruahmanna a siamte state-te'n an chhawr ṭangkai mek thu a sawi.
Lal Thanhawla chuan, centrally sponsored scheme (CSS), skill development leh Swaach Bharat Abhiyaan-ahte hmalakna chak leh sâwt zawk a awm theihna atan Sub-Group of Chief Ministers dinin rah ṭha a chhuah mek tih a sawi a, "NITI Aayog-in ram leh mipui hmasawnna tura kawng hrang hranga ruahmanna a siamte state-te'n kan chhawr ṭangkai mek. NITI Aayog zûlzuiin Mizoramah pawh State-level Task Force for Agriculture Development leh Task Force for Elimination of Poverty-te din a ni," a ti.
Sorkar laipuiin chhiah lak dan thar a siam, Goods and Services Tax (GST) leh Digital India-te chu Mizoram sorkarin a thlâwp thu sawiin CM Hawla chuan, "Hengte hi changtlung taka kalpui turin internet connectivity a pawimawh hmasa a. Mizoram ang tlang ramah optical fibre cable thlun zawmna atan lei laiha phûm chu chona lian tak a ni," a ti a; Mizoram tan kawlphetha châwmna line hrûla optical fibre thlun zawm leh kaltir tura hmalakna siam ni se a duh thu a sawi.
Lal Thanhawla chuan, telecom sector, sorkar enkawlna aṭanga tihzalen (decentralised)-in inthlunzawmna (connectivity) ṭha a hring chhuak thei tih sawiin, "Bharat Net hi hmarchhak state-te'n ṭangkai zawka an chhawr theih nan state-te geography mil leh an mamawhte ngaihtuahna leh ruahmannate chak taka kalpui a ngai a ni," a ti.
Chief Minister chuan, lo neitute leh kut hnathawktute thawh chhuah a lêta tihpun a nih thu sawiin, green revolution thawh hnihna hnuaia tunlai thiamna nena hmarchhak mamawh scheme, a chhawrtu turte ráwn chunga duang turin sorkar laipui a ngen a; retheihna ûmbona tur scheme hrang hrangte chu kalpui zel a, a hma thei ang bera retheihna tehfung 'poverty index' tihfel a ṭul thu a sawi.
CSS awmze nei zawka kalpuina turin scheme hrang hrang - core of core, core leh optional-te thliar dan ennawn a pawimawh tih sawiin Lal Thanhawla chuan, "A rang lama ennawn a ṭul. Hmarchhak state-te tan 10% aia tam matching share pek a harsa a, scheme tam zawk chu hmarchhak state-te tan core scheme anga kalpui tura hmalak ni se," a ti.
CM Lal Thanhawla chuan, hmarchhak tan interstate air connectivity a pawimawh thu sawiin, "A bul ṭan nan state khawpuite thlawhna tê chi leh helicopter hmanga thlun zawm theih ni se," a ti a; helicopter chu hmarchhak state mipuite chauh ni loin, ram hruaitute'n an chhawr ṭangkai theih tur thu a sawi a ni.