Lunglei Civil Hospital hnenah Zodintluanga'n RT-PCR a pe. Lunglei Civil Hospital-in kawl ngam loin DC-ah an pe kir

Congress Legislature Party (CLP) leader Zodintluanga Ralte chuan, Lunglei Civil Hospital (LCH) laboratory-a hman tur  Covid-19 vei leh vei loh enna Reverse Transciptase Polymerased Chain Reaction (RT-PCR) khawl a lei thar chu nimin khan district bawrhsap V Lalsangliana hnenah a hlàn. Hetihlai hian Lunglei Civil Hospital chuan khawl hi an kawl ngam lo.

DC office-a khawl inhlanna neih zawh hian RT-PCR leh refrigerator hi Lunglei Civil Hospital-ah phurh phei a ni. Lungleia thuthar thehdarhtute zawhna chhangin Lunglei Civil Hospital hotute chuan sorkar pawmpuina a awm loh avangin RT-PCR chu an kawl ngam loh thu an sawi a, "Kan dah let leh turah kan ngai," an ti. Nimin tlai dar 6;00 vel khan DC office-ah an dah lêt leh a ni.

RT-PCR inhlannaah Zodintluanga Ralte chuan, Covid-19 do turin Lungleiin mamawh a ngah tih sawiin, "MLA fund hmangin ambulance-te ngaihtuahsak an ni. Lungleiah hian Covid-19 vei leh vei loh enna khawl a awm mipuiin ṭul an ti a, kei pawhin awm ngei se ka duh. Chuvangin, khawl neih dan ka ngaihtuah a, kar khat vel lek chhungin ka chah thleng thei a, ka lawm khawp mai," a ti.

Lungleia RT-PCR dah chu ṭangkai taka hman a nih a beisei thu leh Lunglei, Siaha, Lawngtlai leh Hnahthial district-te'n an chhawr theih tur a nih thu sawiin Zodintluanga chuan, "ZMC lam pawh an zângkhai phah ang a, mipuiin an result an hre zung zung thei dawn a ni," a ti a; sorkar a puih ve theihnaah ngaiin RT-PCR chu a lei thu a sawi.

CLP Leader chuan, RT-PCR khawl thar chu Lunglei DC leh Additional DC-te puihna vanga lei thei an nih thu sawiin, an chungah lawmthu a sawi a; "Kan ṭhian ṭhate'n a ṭul apiangah kan ṭang chho zel ang an ti a, a thlamuanthlak hle. Mite ṭhatna kan hre chho zel a ni. RT-PCR hi politics lam thil ni loin, ṭangkai taka kan hman thuai theih nan kan ṭan rual a ngai a ni," a ti. 

LCH-a khawl thar chu hman nghal rum rum theih a ni lo tih sawiin Zodin­tluanga chuan, "Sorkarin a remtih phawt chuan RT-PCR dah theihna turin LCH-a laboratory awm sa emaw hi chei ṭhat a nih loh pawhin siam thar kan inhuam a ni," a ti a; sorkar thu a hmuh hun hunah hna thawk ṭan nghal tura a inpeih thu a sawi.

Lunglei DC V Lal­sangliana chuan, RT-PCR khawl thar Lungleia dah chu Lunglei chauh ni lo, Mizoram chhim lam mipuiin an hman ṭangkai a beisei thu sawiin, "LCH-a dahna tur hi sorkarin a lo en tawh a, Medical Superintendent pawh sorkarah ziahpui a ngaih chuan keini pawhin kan lo tih turah kan ngai a, a petuin lawm takin min pe a, keini pawhin lâwm takin kan dawng a ni," a ti. Khawl chu Covid-19 lèn tawh loh hnuah pawh a la ṭangkai dawn chauh tih sawiin, "Hotu nei kan ni a, an hnena thlen hi kan lo tih hmasak tur a ni," a ti.

Germany siam Thermo Fisher 7500 Real Time PCR (RT-PCR) hi Thorang bialtu MLA hian Lunglei District Tast Force (DTF) Chairman (Lunglei DC) hnenah a hlàn phawt a, chumi hnuah Civil Hospital-ah LCH-ah dah a ni.

CLP Leader hian a ngenna anga 3:16 Plan Solution-in an pek refri­gerator chu Lunglei Civil Hospital tan a hlân nghal.