CDAR-in sawhthing an lei mek Mizorama sawhtihng lei vek theih beisei

NLUP Implementing Board (NIB) leh Tuirial Airfield-a hmun nei CDAR-te'n thawh dunna thuthlung an siam angin, CDAR chuan April 11, 2017 aṭang khan Mizo­rama sawhthing tharte an lei mek a; Mizorama sawhthing zawng zawng lei theih beisei a ni.

Sawhthing lei khawm­na tur, collection cen­tre chu Saitual, Hliap­pui, Ngopa, Dulte, Ser­chhip, East Lungdar, Khaw­ruhlian, Sesawng, Aibawk, Khawzawl leh Tualchengah siam a ni a; CDAR hmunpui, Tuirial Airfield-ah engtik lai pawhin hralh theih a ni bawk.

Sawhthing lei leh hralh chungchanga zawh­na chhangin NIB vice chairman PL Thanga chuan, sawhthing hi CDAR-in Saitual, Hliap­pui, Ngopa, Khawruhlian, Tualcheng leh Tuiriala CDAR hmunpuiahte lei mek a nih thu a sawi a, "Mizorama sawhthing zawng zawng lei theih an inbeisei," a ti.

PL Thanga sawi danin, Mizorama sawhthing tharte hralh a nih theih nan sorkarin hma a la a, Spice Board of India-ah hmalakpui turin an ngen a ni. Spice Board of India chuan Mizorama sawh­thingte lei a, India ram pawna thawn chhuak thei turin CDAR a thlang a; CDAR hi Spice Board of India hnuaia inziak lut an ni.

Sawhthingte chu a ṭhat dan azirin ṭhen hran (gra­ding) a ni a, a ṭha deuhte chu collection centre-ah kg. khat Rs. 10-a lei niin, a ṭha lo deuhte chu Rs. 8-a lei a ni thung. CDAR hmunpui, Tuirialah chuan a ṭha zualte chu Rs. 11-in an lei bawk.

PL Thanga chuan, sawh­thingte chu a báa leisak an phal lo tih sawiin, "CDAR lam hian ni khatah quintal 300 tal thawn chhuah theih an duh," a ti a; CDAR hian Mizoramah a tlem berah sawhthing metric ton 50,000 tal a awm an beisei thu leh, Horticulture depart­ment chhinchhiah danin, ram hectare 7,650 chuanga zauah sawhthing chìn a nih thu a sawi.

Vanglaini palai zawh­na chhangin CDAR hotu­te chuan, sawhthing hi an lei tam tawh viau a, Tuiriala an kudam bakah, collection centre-a an kudamte a khat vek tawh tih a sawi a, "Kan la thawn chhuak lo a, kan kudamte a khat vek tawh si a, dahkhawlna kan nei tawh lo a, harsatna kan tâwk. Tunah hian a dahkhawlna turin in ruak lian deuh kan zawng mek," a ti.

CDAR hotute sawi danin, CDAR-in sawh­thing an leite hi ram dangah thawn chhuah a ni dawn a, chuta tan chuan Karimganj lawng chawlhhmunah an kalpui phawt ang a, chuta ṭang chuan ram dangah kalpui a ni ang. Vawiin aṭangin thawn chhuah theih an inbeisei.

CDAR hotute chuan, Mizorama sawhthingte chu lei vek theih an in­bei­sei thu an sawi a; chu­tih rualin, vai hoin sawh­thingte lei tuma cho tura an lo tih tawh vanga thla hnih vel kal taa chawh tawhte zinga a hmuar a tam a, chu chu an harsatna ber leh an buaipui nasat a nih thu an sawi bawk.

Sawhthing hralh dan tura hriat chian duh nei chuan phone no. 7005928989 leh 8730050600-ah zawh chian theih a ni.