Mizoram sorkarin Central a dàwr tâwk lo - Mizoram BJP President

BJP, Mizoram Pradesh president Prof. JV Hluna chuan, Mizoram sorkara thawkte'n 7th. Pay an hman ve theih rih loh chungchangah leh, CSS hnuaia Hindi zirtirtute rawih chhunzawm an nih theih nan Mizoram sorkarin sorkar laipui an dàwr ṭha tâwk lo niin a sawi.

Prof. JV Hluna hian nimin khan Aizawl Press Club-ah thuthar thehdarhtute a kâwm a; 7th. Pay leh CSS Hindi teacher-te chungchangah hian, "Hengte hi pe turin Central-in a harsat lo. Mizoram sorkarin a bawhzui lo zawk a ni," a ti.

BJP President chuan, CSS hnuaia Hindi zirtirtute chu Central plan period a tàwp hnuah state sorkarin a sumin a ruai chhunzawm tura tih a ni tih hre reng chungin Mizoram sorkar chu an inbuatsaih lo niin a sawi a, "Hindi zirtirtute'n nasa taka an nawr chung pawha nuihzatbur leh hmusit tak taka an la ṭawng khum fo hi BJP Mizoram Pradesh chuan kan khawngaih em em a ni," a ti a; Hindi zirtirtute chungchang chu Central sorkar hotute hnena thlensak turin an inpeih reng thu a sawi.

JV Hluna chuan, April 15-16, 2017-Bhubaneshwar-a BJP National Executive meeting-ah CSS Hindi zirtirtute chungchang chu Human Resources Development (HRD) minister Prakash Javedekar a sawipui thu sawiin, chuta ṭang chuan Mizoram sorkarin Hindi zirtirtute dah nghehna tura mamawh angte Mizoram sorkarin Central-ah a la thlen lo tih a hriat thu a sawi a, "Mizoram sorkar hian official-in CSS Hindi teacher 1,305-te lak nghehna tur plan leh budget siam se, thawn thuai rawh se," a ti.

Mizoram BJP President chuan, sorkar laipuiin 7th. Pay a hmang tawh tih sawiin, Union Finance Minister a sawipuinaah, Mizoram sorkarin a pawm a, sum mamawh zatte Central-ah an sawi loh avangin Mizoram chu mahni pe thei turah an ngai niin a sawi a, "A thei lo a nih chuan an chhût chhuah a, requirement an siam a, Central-ah an dil a ngai a ni," a ti a; sorkar hnathawkte'n 7th. Pay an lak theih nan sorkar laipuia dilpui an inpeih reng thu a sawi.

Prof. JV Hluna chuan kum 2018-a Assembly inthlan chungchanga zawhna chhangin, BJP anga din an la tum zel thu a sawi a, "Pawl angin tumah kan la sawm lo. Mimal ang chuan tu pawh kan sawm a ni," a ti.

MADC inthlan turah candidate paruk an nei a, pathum chu an tlin ngei tur thu a sawi a ni.