Police-te'n pawisa lem man chhuah dan an zir

Nimin khan Aizawl SP pisa conference hall-ah police officer-te pualin pawisa note thar, Rs. 2,000 leh Rs. 500 note lem man chhuah zung zung a nih theihna turin, pawisa tak leh a lem danglamnate zirna, 'Training on sensitization & identification of new currency note' buatsaih a ni a, DIG Joseph Lalchhuana'n a hmanpui.

Joseph Lalchhuana chuan, pawisa note lemin India ram economy-ah nghawng a neih len thu sawiin, "A bikin ni tin inhlawhfàte leh eichawp zuara sumdawngte'n an tuar nasa thei hle," a ti a; pawisa lem hmuh chhuah chu tute pawl kutah emaw dah mai lo a, a dap chhuah kawngah theihtawp chhuah lehzual turin police officer-te a chah.

November 9, 2016-a Rs. 500 leh Rs. 1,000 note tihthih a nih hnua Rs. 2,000 leh Rs. 500 note thar tihchhuah a nih hnu lawkah pawisa note lem a awm thu sawiin Joseph Lalchhuana chuan, "Pawisa lem chungchangah hian State Level Coordination meeting neih a ni tawh a, RBI Director pawh hriattir a ni. Mizorama pawisa lem man hi RBI lamin an ngaimawh hle," a ti.

CID (Crime) SP Lallianmawia chuan, "Rs. 1,000 leh 500 note tihthih a nih hnuin pawisa lem hi misualte'n thehdarh tumin an bei nasa hle. Vawiin thlengin Mizoram police-te'n Rs. 2,000 note lem 2,720 (Rs. 54,40,000 hû) leh Rs. 500 note lem 22 (Rs. 14,000 hû) an man tawh a, a vaiin cheng nuai 54. 5 an man tawh," a ti a; pawisa lem man kaihhnawihah thubuai pakua ziah luh a nih tawh thu a sawi.

CID (Crime) SP sawi danin, pawisa lem siam emaw, a siamnaa inhnamhnawih emaw, a thehdarhtute emaw chu IPC Section 489(a) leh (b) hnuaiah dam chhunga tàntir thlenga hrem theih a ni. Pawisa lem hre reng chunga kawl chu IPC Section 489(c) hnuaiah kum sarih thleng tàntir theih an ni a, pawisa lem siamna hmanrua siam emaw, kawl emawte chu IPC Section 489(d) hmangin dam chhung tàntir thlenga hrem theih a ni bawk.

Lallianmawia chuan mipui chu pawisa lem laka fimkhur tura a chahin, "Mi náwlpui tana pawisa lem hriat hran theihna tur chu, pawisa note thar Rs. 2,000 leh Rs. 500 note chu a security thread pawisa laia inrín thla chu a sir zawnga enkualin rawng chi hrang hrang tle deuh leh hring deuhte'n a lang thei a, pawisa lemah chuan hengte hi a lang ve thei lo," a ti.