Kum 2016-17 chhungin Lunglei District-ah nausen thi 24 an awm
Health & Family Welfare department leh National Health Mission (NHM) chuan, nimin khan Lunglei DC Lalzarmawii kaihhruaiin DC conference hall-ah Lunglei district-a Reproductive Maternal Newborn Child + Adoloscent Health (RMNCAH) review meeting an buatsaih a; kum 2016-17 sorkar kum chhungin nu nau chunga thi pahnih leh nausen thi 24 an awm tih tarlan a ni.
Lalzarmawii chuan, nuin nau a pai a, a hrinnaah hriselnaa bul a ṭan a pawimawh tih sawiin, "Tleirawl aṭanga nu leh pa ni tura inpuahchahnaah hriselnaa ṭan kan lak chuan nu leh pa nih hnuah harsatna a thleng tlem ṭhin," a ti a; nau pai laiin nutrition ṭha ei a pawimawh thu a sawi.
RMNCAH hi Mizorama district pali - Lunglei, Lawngtlai, Saiha leh Mamit district-ahte kalpui mek a ni tih sawiin, Lunglei DC chuan, "Tihlawhtling turin Health department bakah department hrang hrang kaihhnawihte leh tlawmngai pawlte nen ṭanho a pawimawh hle a ni," a ti.
Lunglei CMO Dr VLMS Dawngliana sawi danin, Lunglei district-ah hian district dospital pakhat (Lunglei Civil Hospital), community health centre pakhat, public health centre pakua leh sub-centre 24 a awm. Rastrya Bal Swasthya Karyakram (RBSK) hnuaiah team paliin district chhunga sikul naupang 29,494-te hriselna dinhmun an enfiah tawh a ni.
Lunglei district-ah hian kum 2016-17 chhung khan nu nau chunga thi pahnih an awm a, kum 2015-16 chhungin pali an awm. Kum 2016-17 chhungin nausen kum khat hnuai lam thi 24 an awm a, kum 2015-16 chhungin 79 an awm thung.