Governor-in Aizawl FC a lawmpui

Governor Lt.Gen. Nirbhay Sharma chuan, nimin khan Aizawl Footbal Club player-te leh hotute chu Raj Bhavan-a lêngah a sawm a, April 22, 2017-a Aizawl FC-in Mohun Bagan an hneh lawmpuina thingpui a inpui.

Larsap chuan, Aizawl FC chu I-League khelh mekah duhsakna hlanin, Mizo ṭhalaite ngaihsan leh entawn an ni tih hre reng turin a tuih a, "Mizoram leh Mizote chauh ni loin, ram chhung leh páwna mite mit in chung­ah a fu mek a ni," a ti. Inrinnia Mohun Bagan an hneh hnuah India ram chhung leh pawn hmun hrang hrang aṭangin mi tam takin amah an biak thu sawiin, "Aizawl FC tana duhsakna an rawn hlan a ni," a ti.

Aizawl FC chuan Aizawl hming pu mah se, Mizo bakah hnam dang­te, sakhua leh ram hrang hranga mi an awm chu a lawmawm a tih thu sawiin Governor chuan, "In­unauna leh inhriatthiam tawnna boruak ṭha zawk siamna kawngah Aizawl FC hi a entawn tlak a ni," a ti. April 30-a Shillong Lajong nena an inkhelh tur­ah leh an champion ngei theih nan duhsakna hlanin, khawvel hriat khawpa Mizo hming chawi sángtu nih tum turin a fuih a ni.