MNF-in Lawngtlaiah SEDP an hawng
MNF party chuan nimin khan Lawngtlaia CYLA Hall-ah an policy thar, Socio Economic Development Programme (SEDP) hawnna hun an hmang. SEDP hawngtu, MNF vice president Dr R Lalthangliana chuan, "Kan sorkar aṭanga budget session hmasa berah SEDP atan cheng vbc. 1000 aia tlem lo kan dah ngei ngei dawn," a ti.
Lawngtlaia SEDP hawnna inkhawm hi Lawngtlai district MNF president Manghmunga Chinzah-in a kaihruai a; R Lalthangliana chuan, "SEDP hi Congress NLUP leh NEDP nen khaikhin chi a ni lo a, danglam tak a ni. Congress chuan sorkar tûka NLUP sem tur anga insawiin mipui an bum a, an sorkar aṭanga term chanve dawnah installment-in an pe phauh a ni," a ti a; NLUP a hlawhchham avangin NLUP chu NEDP tiin a hming an thlak ringawt niin a sawi.
Dr R Lalthangliana chuan, MNF chuan engkim hre sa vekin SEDP an duang nia sawiin, "Sorkar tûk aṭangin bul kan ṭan nghal dawn a, budget session hmasa berah SEDP atan cheng vbc. 1000 aia tlem lo kan dah nghal dawn. Kum 2020 velah chuan a lêta pungin vbc. 2000 chuang kan dah tawh ang," a ti.
MNF Vice President chuan, lehkhathiam leh training hrang hrang zo tawh, hna la hmu lote tan Unemployment Allownce Scheme hmangin thla tin stipend an pe dawn niin a sawi a, "Sorkar hnathawk awm lohna chhungkuaah thla tin hlawh an neih theih nan sorkar/company/corporation-ah hna kan siamsak vek ang a, damlo natna khirh bik cheng nuai tam tak sênna thlengin free medical treatment kan pe vek dawn," a ti.
Kawngpui ṭha te, tar leh upa te, kuttual leichhamte tan a bik taka enkawlna an siam dawn thu te; lo vah man, thlai chi man, a thawh chhunga ei tur, thlai hralhna leh chhawmdawlna zawng zawngte SEDP-ah an huamtir vek thu te; chhung tin tan eizawnna ngêlnghet an siamsak dawn thute a sawi bawk.
Dr R Lalthangliana chuan, an party-in sorkarna an chelh hmasak chhungin Congress kaihhruai sorkarin district thar panga a puante chu a taka an tihpuitlin vek thu sawiin, hmasawnna kawnga nasa takin hna an thawk niin a sawi a; an sorkar laia an tih tur tam tak an tih lohah ngaihdam a dil rualin, "Pathian leh mipui zarah kum 2018-ah sorkarna kan siam ngei dawn tih ka puang a ni," a ti.