Zirtirtute aikal la lo turin ngen

Pang Zirlai Pawl (PZP) chuan thuchhuah siamin, hna duh vanga zirtirtua lakte'n aikal an la ṭhin chu an hrethiam lo tih an tarlang a, "Aikal late'n la tawh lo a, anmahni ngei kal turin kan duh a ni," an ti.

PZP chuan, Vaṭhuampui, Bungtlang South, Mautlang South, Chamdurtlang, Chamdur-P, Chikhurlui leh Vaseikai khuaahte primary school leh middle school-ah zirtirtu aikal la an tam hle niin an tarlang.

PZP tarlan danin, zirtirtu aikal late'n an aia kal tura an lakte chu zirtir hnaa tawnhriat nei lo leh zirtirtu ni tura tling lote an ni hlawm a, a ṭhen chu pawl 10 leh 12 pass satliahte an ni.

Zirtirtu mi aia kalte thiam tâwk loh vanga zirlai naupangte'n an tawrh dawn ai chuan, aikal la tawh lo turin zirtirtute an duh tak zet thu sawiin PZP chuan, "Zirtirtu mahni post-a awm lo tam lutuk pawh an thawhna veng (khua)-ah awm vek tur leh zirtirtu sikul kal ṭha lote pawh naupang tan ṭhahnem­ngai taka zirtirna pe turin kan duh," an ti. Zirtirtu aikal lak chungchangah hian a rang lama hma lak turin thuneitute an ngen ngen bawk.