Inkhàrkhip thlahdul hret a ni Lirthei intlân chhâwk a ni dawn

Chief secretary Lal­nunmawia chuan nimin khan thupek chhuahin, Covid-19 vanga in­khàrkhip kalpui mek chu June thla chhung atan thlahdul hret a nih thu a tarlang. Ruahmanna tharah hian lirthei an intlân chhâwk dawn.

Chief Secretary chuan, tun ni hnih chhungin RT-PCR hmanga swab sample endik 2,200 chuang zingah Covid-19 vei mi pahnih chauh hmuh belh a nih thu tarlangin, "Covid-19 vei a zatve aia tam an dam leh tawh a ni. Tun dinhmunah khawtlanga inkai darhna a la awm loa hriat a nih avang leh mipui harsatna sutkianna atan total lockdown kalpui mek chu thlahdul deuh ṭhaa hriat a ni," a ti.

Order hi Aizawl Mu­nicipal Corpo­ration huam chhung leh district head­quarter-ah hman tur a ni.

•    Dawr leh sumdawnna hmun hawn phal a ni. Khawpui lûn lai leh building khata dawr awmte chu ni khat kár danah inhawn chhâwk tur a ni a, chumi atan chuan DC kaihhruaina hnuaiah local task force-te'n ruahmanna an siam ang.

•    Kawng síra inpho (hawker)-te awm dan tur chu DC kaihhruaina hnuaiah local task force-te'n an rél ang.

•    Mipui veivahna lirthei (city bus, taxi, maxicab) leh mimal lirtheite chu odd-even angin tlân phal a ni. Lirthei number even (kawpkim)-te chu Thawhṭanni, Nilaini leh Zirtawpniah an tlân thei a, odd number (kawpkim lo)-te chu Thawhlehni, Ningani leh Inrinniahte an tlân thei ang.

•    Pathianniah chuan phalna nei sate bak chu lirthei tlan chhuah phal a ni lo.

•    Lirthei tlàn loh nía loh theih loh vanga chhuah ngaite chuan Traffic SP-ah phalna lak tur a ni.