KHAWTHLIR

Champhai DC Maria CT Zuali chuan thupek chhuahin, vawk pûl hri léng laka inven nan Myanmar leh state dang aṭangin vawk, vawksa leh vawksa aṭanga siam reng reng lak luh leh thawn chhuah khap a nih thu a puang. AH&Vety department aṭangin Myanmar, ṭhenawm ram dang leh hmarchhak state ṭhenkhatah PRRS leh African Swine Fever a léng mek tih thu an dawn avangin thupek hi chhuah a ni.

Fisheries department chuan nimin khan Lawngtlai district-a sangha dil siamtute hnenah ṭanpuina an sem. Ṭanpuina dawngtute hi mi 50 an ni a, thlám sakna tur, dîl enkawl zuina tur, dîl thar siamna tur, kawr dâwlna tur leh sangha notê siamna turte sem a ni.

Champhai District Level Task Force (DLTF) chuan nimin khan Indo-Myanmar Border trade behchhana sumdawnna hrang hrang - EXIM, CIETU leh SYNDICATE hnen aṭangin ṭan­puina Rs. 1,00,000 leh Mizoram Ex-Servicemen League, Champhai aṭangin Rs. 10,000 an dawng. Champhai DTF-in ṭanpuina  a dawn tawh zawng zawng chu Rs. 6,95,100 a ni.

Sairengpuia Pautu s/o Lalvullura, Kawrtethawveng chu nimin khan Covid-19 dona leh a veite enkawlnaa a ṭul apiang thawk turin a in pe a, Mamit CMO hnenah a inhriattir. Sairengpuia hi laboratory technician a ni.

Chief minister Zoramthanga hoin nimin khan Cabinet meeting room-ah Smart City hmalakna hnuaia Aizawl tichangtlunna tur project ṭhenkhat thlirho a ni. Meeting-ah hian deputy CM Tawnluia, Sports minister Robert Romawia Royte leh UDPA secretary Dr C Vanlalramsanga te an tel.

Vanglaini columnist KL Liana chu cancer natna avangin a damlo a, anmahni inah thisen chawte pein enkawl mek a ni. A ṭhat chhuah leh thuai Vanglaini chuan a beisei.