Police-in dawr hawn khàrtir an tum; Dawrpui LTF-in dawr khàrtir an phal lo

Dawrpui Veng Local Task Force (LLTF) chuan nimin aṭang khan an huam chhunga dawrte chu a inchhâwkin an hawntir. Dawr inhawngte chu police lamin khartir an tum a, Dawrpui LTF-in an remti lo thung.

Dawrpui LTF-te hian an huam chhunga dawrte chu damdawi zawrhna tiam lohin A leh B-ah ṭhenin a inchhâwkin an hawntir a; damdawi dawr tih loh chu sorkarin hawn a phalte pawh a inchhâwkin an hawntir bawk.

Police-te chuan nimin chawhma lam khan sorkarin hawn a phal zinga tel lo dawrte chu inkhâr turin an hriattir a; mahse, Dawrpui LTF hruaitute chu dawr hrang hrangah kal ve nghalin, inkhâr lo turin an ti thung.

Vanglaini palaiin Dawrpui huam chhung a tlawh kual lai chuan Dawrpui LTF thu ang hian dawrte chu hawn chhunzawm a ni a; dawr neitute chuan, Dawrpui LTF thu anga inhawng chhunzawm an nih thu an sawi.

Vanglaini palai zawhna chhángin Dawr­pui LTF chairman Zosangzuali chuan, sumdawngte'n an ngen nasat avangin dawr an inhawn chhâwktir thu a sawi a, "Sorkar lamin hawn an phal loh avangin an mangang tawh a, vawi tam kan hnenah an rawn thlen tawh a ni," a ti.

Zosangzuali chuan, sumdawngte an mangan tawh êm avangin dawr hawn dan tur ruahmanna siam lo thei an ni tawh lo nia sawiin, "Miin ṭanpui min dil chuan ṭanpui an ngai a ni," a ti a, dawr inhawn chhâwk vangin harsatna an tawh phah loh thu a sawi.