Hman khat daih sarang khap a ni

Nimin July 1 aṭang khan Mizoram pumah Plastic Waste Management (Amendment) Rules, 2021 hmangin hman khat daih sarang (single use plastic) hman khap a ni a; khapna dan kengkawhtu tur hrang hrang an awm.

Sarâng hman nawn loh chite chu sorkar laipui thu angin nimin aṭang khan India ram pumah khap a ni a; chumi ang chuan Mizoramah pawh khap a ni. Hman khat daih sarâng kawl, zuar leh hmang luite chu Plastic Waste Management Rules hmangin hrem theih an ni a, Aizawl bikah chuan The Mizoram Municipalities Act, 2007 hmangin hrem theih a ni bawk.

Mizoram Pollution Control Board (MPCB) hotute hnen aṭanga thu dawn danin, Sarang pan chi hman khapna dan kengkawhtu tur hrang hrang an awm a, chu'ng zingah chuan UDPA department, Aizawl Municipal Corporation (AMC), MPCB leh district administration-te an tel. A hun leh hmun azirin dan kengkawhtu an danglam thei dawn a ni.

Sorkar laipui chuan Plastic Waste Management Rules, 2016 hmangin a khap a; chumi ang chuan Aizawl Municipal Corporation (AMC) pawhin micron 50 aia pan sarâng khapna thupek August 1, 2019 khan chhuahin, Aizawl khawpuiah sarâng pan chi hman khap a lo ni tawh.

Sarâng khapna dan chu kum 2021-ah tihdanglam hret niin, Plastic Waste Management (Amendment) Rules, 2021 siam a ni a; sarâng ip micron 75 aia pan hman, kawl leh zawrh khap a ni a, chumi bawhzui chuan AMC chuan December 6, 2021 khan thupek a chhuah. December 1, 2022 aṭanga micron 120 aia pan khap turin inpuahchah mek a ni bawk.

Aizawl bikah chuan sarâng micron 50 aia pan khapna thupek chhuah a nih hnuah AMC chuan phal chin aia pan sarâng hmang an awm leh awm loh an vâi ṭhin a; micron 50 aia pan sarâng ip kg. 5,540 chuang an man tawh. Dan zâwm lote chu a ṭul angin The Mizoram Municipalities Act, 2007 hmangin hrem ṭhin an ni.