CM-in Mizoram RTI Online a tlangzarh Online-in hriat duh a zawh theih dawn

Mizoram Information Commission (MIC) rua­hman angin chief minis­ter Zoramthanga'n nimin khan Assembly Annexe conference hall-ah online hmanga Right to Information (RTI) Act hmanga hriat duhte zawh­na, Mizoram RTI Online a tlangzarh a; Mizoram chu India ram state leh union territory zinga RTI Online nei thei pariatna a ni.

RTI Online hmang hian RTI Act hmanga thil zawh duh nei tan zawhna tur pisaa kal kher ngai loin online hmangin dilna thehluh theih a ni tawh a; website https://rti.mizoram.gov.in/ ah emaw, application emaw hmangin dilna thehluh theih a ni. Application hi download a ngai thung.

Online hmanga dilna thehlut duh, internet emaw, smartphone emaw nei lo tan khaw hrang hrangah common service centre (CSC) leh rural information kiosks 800-te kaltlangin tih theih a ni a, dilna chu a thlen chin chhui zui theih a ni bawk. Fee chawi ngai chu online hmanga pek theih a ni. 

RTI Online tlangzarhtu CM Zoramthanga chuan, RTI Online chu mipuiin ṭangkai taka an hman a beisei thu sawiin, RTI Act chu ram tan, khawtlang tana ṭangkai taka hmang a, thu dik hâi lanna hmanrua a nih tur thu leh a ṭha lo lama hman erawh a fuh loh thu a sawi.

Chief information commissioner Lalnunmawia Chuaungo chuan, RTI Act chu sorkar langtlang siamna tur hmanraw pawimawh tak a nih thu sawiin, RTI Online chuan sorkar langtlang leh mawhphurhna hlen ṭha tak a siam belh tur thu a sawi a ni.

Tlangzarhna inkhawm­ah hian information commissioner Zorammawia, chief secretary mawh­phurhna la mektu Manisha Saxena, sorkar department hotu te, pisa hrang hranga DAA, SPIO, SAPIO-te leh tlawmngai pawl aiawhte an tel a; Information & Communication Technology chief informatics officer Lalthlamuana'n RTI Online software siam a nih dan a a sawi.