Covid-19 laka fimkhur turin mipui chah

Nimin khan Secretariat Conference Hall-ah Health & Family Welfare minister Dr R Lalthangliana kaihruaiin Mizorama Covid-19 dinhmun thlir a ni a, Covid-19 lakah fimkhur zel tur leh invènnate ngai pawimawh turin mipui an chah.

Ṭhutkhawmah hian, tun hnaiah Mizoramah Covid-19 vei an pung thar leh nia sawiin, ngaihthah chi a nih loh thu sawi a ni a; India ram hmunpui lamah a hluar leh ṭan mek avangin lo invèn lâwk a ṭul thu te, mipui an fimkhur thar leh a ṭul thu te, Covid-19 laka invênna, nunphung dik zawm thar leh a pawimawh thute sawi a ni.

Chhiatni ṭhatni leh inkhawmna, zirna-in leh vantlang huap mipui intawh khawmna hmunah hmai tuam ṭhat leh inhnaih loa awm a ṭul thar thu an sawi a; invenna ngai pawimawh thar leh turin kohhrante leh tlawmngai pawlte ngen an rél.

Covid-19 vei nia inringhlelte chu a rang thei ang bera inendiktir tur leh mahnia inenfiahte pawh IDSP hnenah emaw, Health deparment-a bialtute hnenah inhriattir turin an chah a; Covid vaccine lak a pawimawh thu sawiin, vaccine la lak loh chin la ngei turin mipui an chah bawk.

Health Minister chuan, hun eng emaw chen mipui an zalen tawh avangin thla a muang tawh tih sawiin, "Nunphung pangngai kan zawh rei tawh lai hian kan fimkhur hle a la ngai tih kan hriat a pawimawh," a ti.

Ṭhutkhawmah hian chief secretary aiawhin Manisha Saxena, Health secretary Esther Lalruatkimi, Health department hotute leh Indian Medical Association aiawhte an tel a ni.