Lunglei District Sports Complex lungphûm

Minister C Lalrinsanga chuan nimin khan Lunglei Rahsi Vengah Lunglei District Sports Complex sakna tur lungphùm a phúm. Sport Complex hi Ministry of Minority Affairs hnuaia Pradhan Mantri Jan Vikas Karyakram (PMJVK) aṭanga hmuh cheng nuai 4919.31 hmanga sak tur a ni.

C Lalrinsanga chuan, Lunglei District Sports Complex din tur chu hmasawnna ropui tak a nih thu sawiin, Lunglei district-a infiamna hmunhma chi hrang hrang siam mekte chuan hmasawnna nasa tak a thlen a beisei thu a sawi a; district mipuite chu neitu thinlung púa hna thawktute pawh ṭha taka thawhpui turin a chah.

Khualzahawm SYS minister Robert Romawi Royte pawhin thu sawiin, "District Sports Complex atana sanction hmuh hi thil awlái lo tak a ni a, a ken tel infrastructure hrang hrangte hi Lunglei district mipui bakah, Zoram pum ro hlu a ni ang," a ti.

Sports Minister chuan, Lunglei khawpuiah cheng nuai 11,000 hû hna thawh mek a nih thu te, Sports department hnuaia Lunglei project zawng zawng atan contractor thlan vek a nih tawh thu te, July 2022 chhungin project zawng zawng thawh ṭan vek a nih dawn thute a sawi bawk.

Lungphùm phùmna inkhawm hi Rahsi Veng Market Shed-ah neih a ni a, Lunglei HPC vice chairman Lawmawma Tochhawng, Lunglei South bialtu MLA Dr K Pachhunga, SYS secretary Dr Lalrozama, Lunglei DC Kulothungan A, hotu dangte leh pawl hruaitute an tel a ni.

HNA THAWH TURTE
1. Rahsi veng khelmuala phûl lem phah
2. Pavilion leh changing room sak
3. Gallery sak
4. Volleyball court siam
5. Semi indoor basketball court siam
6. A panna kawng siam
7. Ṭhuamluaia Mual thawm ṭhat
8. State Sports Academy, Zobawka running track siam