Sorkar sikulah naupang uniform inang 2023-24 aṭanga hman ṭan turin ti

Mizoram sorkar hnuaia sikulte zirlai uniform inang tlang (common school uniform) hmantir chung changah School Education department in hriattirna a tichhuak tawh a; academic session thar 2023-24 aṭangin uniform inang tlang hman tura tih a ni.

Aizawl District Educa­tion Officer-in June 29, 2022-a thupek (order) a tichhuaha a lan danin, common school uniform hi sorkar sikul (government school)-te bakah, adhoc aided sikul (sorkar puihna dawng sikul)-te pawh hmang tura tih an ni a; uniform-te chu sikulin an buaipui tur a nih thu leh uniform supply leh sem chungchangah sorkar leh department a inrawlh dawn loh thu tarlan a ni bawk.

Sorkar sikula zirlaite uniform chu primary school, middle school, high school leh higher secondary school-ah kekawr tlâwn leh pawnfên rawng a inang dawn lo a, kawr (kamis) vár leh pheikhawk dum vek tur a ni thung. School t-shirt, bag, badge, necktie, kawrlum, kawnghrên leh mawzate chu sikul mal duh thlan ang hman theih a ni dawn.

Hetih lai hian, Mizoram Secondary School Teachers’ Association (MISSTA) Sub-Hqrs, Lunglei chuan May 27, 2022-a conference an neihah common uniform an duh loh thu an tarlang a, 'Common school uniform hmang tura sorkar hmalak mekna hi ṭha kan ti lo tih, a chhan hrang hrang tarlangin sorkarah MISSTA Sub-Headquarters hminga thlen ni se,' an lo ti tawh a ni.