June 2022-ah hripui vei mi 770, Chhuahtir 590, thihpui 5 an awm
Kumin June thla liam ta chhung khan Mizoramah Covid-19 vei mi 770 hmuh chhuah a ni a, May 2022-a hmuh chhuah 883 aiin 113-in a tlem zawk. Hripui vei dam tawh mi 590 chhuahtir an ni a, hripui vangin mi panga an thi.
IDSP, Mizoram chhinchhiah danin, June 2022 chhunga Covid-19 positive hmuh chhuah mi 770 chu chawhrualin ni tin mi 25 chuang hret (25.67) an awm ang a ni a, positivity rate chawhrual chu 10.87% niin, May thlaa 9.06% aiin a sang zawk. Positivity rate hi kumin January-ah 19.75%, February-ah 25.16%, March-ah 15.27% leh April-ah 12.74% a ni.
June 2022 chhungin swab sample 7,086 endik a ni a, May thlaah 9,747, April-ah 23,010 leh March-ah 64,611 endik a ni. June thlaa Covid positive hmuh tam ber ní, ni 28-ah mi 64 hmuh chhuah a ni a; mi 50 aia tam hmuh chhuah ṭum ni thum chiah a awm. Positive hmuh tlem ber ní, ni 29-ah mi pasarih chiah hmuh a ni a, hei hi April 11, 2021-a mi pasarih hmuh chhuah hnua hmuh tlem ber ní a ni.
Hripui vei dam tawh June thlaa chhuahtir zat chu mi 590 an ni a, positive hmuh zat 770 aiin 180-in a tlem zawk. Chhuak an tam ber ní, ni 17-ah mi 34 chhuahtir an ni a, chhuak an tlem ber ní ni 12-ah mi pahnih chiah chhuak an awm.
June 2022 chhung vêkin Covid-19 vei zinga mi panga an thi a; kumin bikah May thlaah mi pahnih, April-ah mi 11, March-ah mi 28, February-ah mi 47 leh January-ah mi 65 an thi a ni.