KHAWTHLIR

Thisen pe
Durtlang Higher Secondary School NSS chuan nimin khan Synod Hospital Blood Bank-ah thisen unit 21 an pe a, petute mipa 16 leh hmeichhia panga an ni. Nimin vek khan Civil Hospital, Aizawl Blood Bank-ah Doctors' Day pualin doctor mipa pakua leh hmeichhia pangate'n thisen unit 14 an pe a, Rotary Club, Aizawl-in unit 15 leh Lungkawlh VC football team-in unit riat an pek bakah, mimala pe (individual donor) mi 26 an awm bawk.

Meizial man
8th Assam Rifles chuan June 30, Ningani khan Zokhawtharah ram dang meizial Rs 2,60,000 hu an man a, Champhaia Custom department hnenah an hlân.

Minister-in hmanpui
Dinthar Local Council chuan June 30, Ningani zan khan Dinthar YMA Hall-ah zirlai pass tharte lawmna an buatsaih a, bialtu MLA Lalruatkima, minister of state-in a hmanpui. Lalruatkima chuan, zirlaite chu hnam rilru púa lehkha zir tura chahin, "Kan hnam tan, kan khawtlang tan leh kan ram tana mi thawh hlâwk ni turin kan zir chhuak tur a ni," a ti a, social media-ah chintâwk nei thiam turin a chah bawk.

MLA-in hmanpui
Ramthar North Branch YMA chuan June 30, Ningani zan khan Career Guidance programme an buatsaih a, bialtu MLA Dr Vanlalthlana'n a hmanpui. Vanlalthlana chuan, thil tihna, zirlai leh hnathawhnaahte beidawng loa beih ṭâlh ṭâlh a pawimawh tih sawiin, "Kan ram leh hnamin boralna kawng a zawh mai loh nan ṭhalaite'n ram leh hnam humhalh hi mawhphurhnaa kan lâk a ngai a ni," a ti a; Ramthar North YMA Library tihchangtlun nan Rs 50,000 man lehkhabu a pek dawn thu a sawi bawk.

Lehkhabu tlangzarh
Saihnuna Memorial Society-in Léng khaw lal Saihnuna Fanai chanchin leh a hlate dah khawmna an buatsaih, ‘Leng Lal Saihnuna Fanai’ tih lehkhabu chu nimin khan minister R Lalzirliana'n Synod Conference Centre-ah a tlangzarh.