Khârchhâwngte'n an hlêp hnem lutuk MIMA-in ṭha an ti lo, hmalak an tum

Sumdawng pawl intél khawm, Mizoram Merchant Association (MIMA) chuan, Mizo thlai thar chhuah khâr chhâwngtute'n an zuar to thei lutuk chu ṭha an ti lo a, hmalak an tum.

Vanglaini palaiin a kawmnaah MIMA president PC Laldinthara chuan, khârchhâwngte'n an hlêp tam ṭhin lutuk chu an pawlin an vei thu sawiin, "A thuphung chuan kan sawiho tawh a, official erawh chuan kan la sawiho lo. Committee-ah sawihoin, a ṭul angin hma kan lak ngei ka ring. Sorkar nena thawhhona chi pawh a nih a rinawm," a ti.

PC Laldinthara chuan, sum­dawng chuan hlép a nei tur a nih thu sawiin, "Hlép nei loa sumdawn ngawt chu tu tan mah tih chi a ni lo. Chutih rualin, khârchhâwngte'n a lêt 3/4 an hlép ṭhin hi chu ṭha kan ti lo," a ti a; a àwm chhin tâwk khârchhâwngte'n an hlêp theih nan hmalak a ṭul thu a sawi.

Khârchhâwngte'n an hlêp hnem lutuk chu loneitute pawhin an vei thu sawiin MIMA President chuan, "Keini pawhin loneitute aṭangin report kan dawng nual. Loneitute'n tláwm taka an khàr chhàwntir laia to taka zawrh leh si hi thil dik a ni lo. Rim taka thawktu loneitute chuan mipui dinhmun thlirin tláwm zawkin an hralh hrâm hrâm a ni," a ti.

PC Laldinthara chuan, Mizo mipuite'n Mizorama thar chhuah ngei lei duh mah se, a to avangin an lei loh phah ṭhin thu sawiin, "Phai aṭangin tláwm zawkin thlai an rawn thawn a, a tláwm na nâ nã chu mipuite'n an lei leh ṭhin," a ti a, mipuite'n Mizote thar an lei theihna atan phai aṭanga lo lut tur dan chángte a awm thu a sawi.

Sumdawngte'n Silchar tuilian an tawrh leh tawrh loh zawhna chhangin MIMA President chuan, "Kan tuar lutuk lo a, chutihrualin, kan stock a kám hlawm tawh viau. Thil chhe hma deuh, thlai thar zuarte aṭang pawhin harsatna an tawh report kan dawng lo. Mizo thar a tam lai a nih vang a nih a rinawm," a ti.