Mipui lam aiin ram hruaitute'n dan an palzût nasa zawk - ZPM Working President

ZPM working president K Sapdanga chuan, mipui aiin ram hruaitute'n dan an palzût nasat zawk thu a sawi a; kum 2023 MLA inthlanpuiah ṭhalaite an chhawr dawn a, candidate atan hna thawk thei an dah dawn thu a sawi.

ZPM Ṭawi West Block-in nimina Thingsulthliah Cluster Resource Centre-a political training an neih a hmanpuinaah K Sapdanga chuan thu sawiin, dan a tam hle a, mahse, zawm an hlawh vek lo tih a sawi a, "Dante hi mipui lam aiin kan ram hruaitute hian an palzût nasa zawk. Kan dan neih sate hi zâwmin zah ila, kan Kristianna hian kan ram rorelna chhung ril ber hi changin awmzia nei se tih hi kalphung thar chu a ni a, ZPM innghahna chu kalphung thar, mipui sorkar tih a ni," a ti.

K Sapdanga chuan, Mizorama mi tam zawk chu kut hnathawka eizawng an ni tih sawiin, "Kan policy-ah thlai thar lei dan tur kan mithiam rualte'n ṭha leh mumal takin an duang chhuak a, kut hnathawktute tan khua a var tawh dawn a ni," a ti a, ZPM chuan kut hnathawktute hamṭhatna tur hi a ngaih pawimawh thu a sawi.

Mizoram siamṭha turin páwn lam aṭangin nasa taka an beih tawh ṭhin thu sawiin Sapdanga chuan, "A harsa em em mai a, sorkar kan hrawn mek leh kan hrawn tawhte hian an thil tih ṭhatte inchhunzawmsak aiin, insawihnawngsak hi nuam an ti zawk emaw tih tur hian hma an la ṭhin ni berin a lang," a ti.

ZPM Working President chuan, Mizoram chu kum 35 chhung state a ni tawh tih sawiin, "Keimahni ruala state ni ve kan ṭhenawm ramte hmasawnna mawng phê pawh kan hmu hman lo. Sorkar thar kan mamawh a ni tih tuna kan dinhmun hian a hril chiang em em," a ti. Kum 2023-a inthlan tur sawiin, "ZPM chuan ṭhalaite thâ kan chhawr dawn a, candidate tur pawh ṭhalai rual an nih kan beisei. Kan hruaitute hian kan sakhua zah thiam, hna thawk thei an dah dawn. Enchhin kan cho a, kan inhuam em em a ni," a ti bawk.

Resource person Dr Vanlalthlana, MLA pawhin thu sawiin, "Kan ram siamṭhat a ngaih thu kan tlangaupui nasa ṭhin a, mahse, huaisen taka bei ngam kan awm lo ṭhin. Dikna leh rinawmna tung ding tur chuan kan huaisen a ngai a ni," a ti.