ASF lenna hmunah vawk 12,262 thi tawh

Vawk pùl hri, African Swine Fever (ASF) vangin kumin 2022 bikah Mizorama khua/veng 96 chu ASF infected area-ah puan a ni tawh a, infected area bikah vawk 6,772 thi tawhin, vawk 5,490 suat a ni tawh a, vawk thi zawng zawng 12,262 a ni. Nimin khan vawk 60 a thi a, vawk 23 suat a ni bawk.

Kumin bikah nimin thleng khan district 11 zinga pakua - Aizawl, Lunglei, Champhai, Kolasib, Serchhip, Mamit, Saitual, Khawzawl leh Hnahthial district-a khua/veng 96-ah ASF a léng tih finfiah a ni tawh.

Aizawl, Lunglei, Champhai, Kolasib, Serchhip, Lawngtlai, Mamit, Saitual, Khawzawl leh Hnahthial district-ahte vawk hri lênna nia rinhlelh, infected area-a la puan loh khua/veng 64 awmin, chu'ngah chuan vawk 1,189 a thi tawh a, vawk 190 suat a ni tawh bawk.

District pakuaa ASF lênna khua/veng 96 zinga 28 chu Champhai district-a mi a ni a; Champhai district-ah hian ASF vangin kuminah vawk 2,888 thi tawhin, kumina ASF vanga Mizoram puma vawk thi 6,772 aṭangin 42.71% a ni. Vawk suat tawh zawng zawng 5,490 aṭangin Champhai district-a vawk suat zat 3,621 chu 65.95% a tling.

Aizawl district-ah nimin thleng khan ASF lênna khua/veng 25-ah vawk 1,398 a thi tawh a, vawk 555 suat a ni tawh. Aizawl district-a ASF infected area 25 zinga 15 chu Aizawl khawpui chhunga veng hrang hrang a ni.

Champhai district-a Farkawn khuaah ASF vanga vawk thi leh suat a tam ber a, vawk 830 thi tawhin AH&Vety department hriatpuinain vawk 1,729 suat a ni tawh. Saitual district-ah ASF lênna khua/veng paruk awmin, vawk suat an la awm lo.

ASF lênna hmuna vawk suat 5,490 leh ASF rinhlehna hmuna vawk suat 190 chu a vaiin 5,680 a ni a, hri lenna hmun leh rinhlelhna hmuna vawk thi zawng zawng chu 7,961 a ni. ASF infected area-a puan tawh leh la puan loha kumina Mizorama vawk thi zawng zawng chu 13,641 a ni.